काठमाडौं । नेपाली फास्ट बलर अविनाश बोहराले टी-२० आई क्रिकेटमा ५० विकेट पूरा गरेका छन् ।
टी-२० त्रिकोणात्मक श्रृंखला अन्तर्गत बिहीबार मूलपानी क्रिकेट मैदानमा हङकङ विरुद्धको खेलमा विकेट लिएपछि उनले टी-२० आई मा ५० विकेट पूरा गरेका हुन् ।
अविनाशले १७औं ओभरको तेस्रो बलमा यासिम मुर्ताजालाई कप्तान रोहित पौडेलबाट क्याचआउट गराउँदै ५० विकेट पूरा गरे । त्यसपछि उनले अदित गोरावारालाई पनि आउट गर्दै खेलमा २ विकेट लिएका थिए ।
अविनाश टी-२०आईमा ५० विकेट पूरा गर्ने तेस्रो नेपाली बलर हुन् । यसअघि नै सन्दीप लामिछाने र करणले केसीले ५० विकेट लिइसकेका छन् । सन्दीपले नेपालका लागि सर्वाधिक ८९ विकेट लिएका छन् भने करणले ६९ विकेट लिएका छन् ।
अविनाशले ५० विकेट पूरा गर्दा खुशी लागेको र योजना अनुसार खेल्दा सफल भएको बताए । ‘हामी आफ्नो योजनामा क्लियर थियौँ । मैले पनि सोचेको थिएँ । त्यसमा सफल भयौँ’, उनले भने ।
सन् २०१९ मा युएई विरुद्ध टी-२० आईमा डेब्यु गरेका अविनाशले नेपालका लागि ४१ खेल खेलिसकेका छन् । डेथ ओभर स्पेसलिस्टको रुपमा परिचित अविनाशले असोजमा चीनमा भएको एसियाडमा माल्दिभ्स विरुद्ध ६ विकेट लिँदै एकै खेलमा धेरै विकेट लिने नेपाली बलरको कीर्तिमान पनि बनाएका थिए ।
