— डिफेन्डिङ च्याम्पियन इंग्ल्यान्डले विश्वकप २०२३ मा शनिबार दक्षिण अफ्रिकाको हातबाट ठूलो अन्तरको हार व्यहोरेको छ । वानखडे स्टेडियममा भएको खेलमा दक्षिण अफ्रिका २ सय २९ रनले विजयी रह्यो ।
यो हारले अंक तालिकामा इंग्ल्यान्डको स्थिति अत्याधिक कमजोर भएको छ र उसको चार खेलबाट दुई अंक मात्रै रहेको छ ।
पहिले ब्याटिङ गर्दै दक्षिण अफ्रिकाले सात विकेटमा ३ सय ९९ रन बनाएको थियो । जवाफमा इंग्ल्यान्डले २२ ओभरमा नौ विकेट गुमाएर १ सय ७० रन मात्र बनाउन सक्यो । रेस टोपली चोटका कारण ब्याटिङका लागि आउन सकेनन् ।
मार्क उडले इंग्ल्यान्डका लागि सबैभन्दा बढी ४३ रन बनाए । त्यस अगाडि दक्षिण अफ्रिकाका लागि हेनरिक क्लासनले १ सय ९ रन बनाए । उनले १२ चौका र चार छक्का प्रहार गरे । दक्षिण अफ्रिकाको चार खेलबाट छ अंक भएको छ ।
