— युट्युबमा भ्यूज बढाउन जानाजान आफ्नो विमान दुर्घटना गराएको पुष्टि भएपछि अमेरिका ३० वर्षिय युट्युबर ट्रेभर जेकबलाई ६ महिनाको जेल सजाय भएको छ । उनले अमेरिकी अन्वेषकहरुसँग झूटो बयान दिएको समेत पुष्टि भएको बीबीसी लगायतका अन्तर्राष्ट्रिय सञ्चार माध्यमहरूले उल्लेख गरेका छन् ।
जेकबले डिसेम्बर २०२१ मा भएको विमान दुर्घटनाको भिडियो पोस्ट गरेका थिए। उनी हातमा सेल्फी स्टिक लिएर प्लेनबाट बाहिर निस्किएर प्यारासुटमा तल झरेका थिए । २३ डिसेम्बर २०२१ मा युट्युबमा अपलोड गरिएको 'आई क्र्यास माई एयरप्लेन' शीर्षकको भिडियो हटाउनुअघि लाखौं भ्युज थियो ।
विमान उडेको ३५ मिनेटपछि लसप्याड्रेस राष्ट्रिय वनमा विमान दुर्घटनाग्रस्त भएको थियो । दुर्घटनापछि उनले भिडियो अपलोड गरेका थिए । उक्त भिडियो एक वालेट कम्पनीको लागि प्रचारका लागि बनाइएको दाबी गरिएको छ ।
क्यालिफोर्नियाका संघीय अभियोजकहरूले सोमबार भनेका छन्, 'ज्याकोबले सम्भवतः यो अपराध आफ्नो लागि सामाजिक सञ्जाल र समाचार कभरेज गरी आर्थिक लाभ प्राप्त गर्नको लागि गरेको हो।' केही दर्शकहरूले भिडियो हेरेपछि दुर्घटनाको बारेमा शंका गरेका थिए ।
