। जर्मन बुण्डेसलिगा अन्तर्गत शनिवार राति भएको खेलमा बायर्न म्युनिख एनट्राट फ्रांकफर्टसँग ५-१ ले पराजित भएको छ । साविक विजेता बायर्नको यस सिजन यो पहिलो हार हो ।
घरेलु मैदानमा फ्रांकफर्टलाई जित दिलाउन चार फरक खेलाडीले गोल गरे ।
ओमानर मार्मोउस, एरिक एबिम्बे र ह्युगो लार्सनले गोल गर्दै फ्रांकफर्टलाई ३६ मिनेटमै ३-० को अग्रता दिलाएका थिए । जोसुअ किम्मिचले ४४औं मिनेटमा गोल गर्दै बायर्नलाई खेलमा फर्काउने प्रयास गरेका थिए । तर दोस्रो हाफमा फ्रांकफर्टले दुई गोल थप्यो ।
एबिम्बेले व्यक्तिगत दोस्रो र अन्स्गर केनाउफले दोस्रो हाफमा गोल गरेपछि फ्रांकफर्टले फराकिलो जित निकालेको हो ।
इंग्ल्याण्डका कप्तान ह्यारी केनले पूरा ९० मिनेट खेले पनि गोल गर्न सकेनन् । यस सिजन उनले खेलेका १३ मध्ये गोल गर्न नसकेको यो तेस्रो खेल हो ।
हारपछि बायर्नको १३ खेलबाट ३२ अंक छ । उसले लिग लिडर बायर लेभरकुजनसँग अंक बराबरी गर्ने अवसर गुमायो । समान खेलबाट लेभरकुजनको ३५ अंक छ ।
लेभरकुजनले आइतबार तेस्रो स्थानको भिएफबी स्टुटगार्डसँग खेल्दैछ । स्टुटगार्डको १३ खेलबाट ३० अंक छ ।
बायर्नलाई हराएको फ्रांकफर्ट १४ खेलबाट २१ अंक जोडेर सातौं स्थानमा छ ।
