। ग्रेटा गेर्विग निर्देशित हलिउड फिल्म ‘बार्बी’ले यस वर्ष विश्व बक्स अफिसमा १.४ बिलियन डलर कमायो । गोल्डेन ग्लोबमा यो फिल्म ९ विधामा मनोनित छ । यी उपलब्धिबीच ग्रेटा सन् २०२४ को कान्स फिल्म फेस्टिभलको लागि जुरी अध्यक्षमा चयन भएकी छन् ।
उनले सन् २०१७ मा ‘द मेयरोविट्ज स्टोरिज’ प्रिमियरको क्रममा पार्टनर नोआ बाउम्बाचसँगै कान्समा भाग लिएकी थिइन् । तर त्यहाँ कहिल्यै फिल्म प्रस्तुत गरिनन् । यस वर्षको सुरुमा ‘बार्बी’लाई कान्समा प्रिमियरको लागि वार्ता पनि भए तर समयले उनको लागि काम गरेन ।
वार्नर ब्रदर्स स्टुडियोको यो फिल्म जुलाई १९ मा रिलिज भएको थियो । यस वर्ष सबैभन्दा धेरै कमाउने फिल्म मात्र बनेन, क्लासिक फिल्मको रुपमा प्रशंसा बटुल्यो । गोल्डेन ग्लोबसँगै अब ‘बार्बी’ले ओस्कार मनोनयनमा पनि दबदबा जमाउने अपेक्षा गरिएको छ । भेराइटी म्यागजिनका क्लेटन डेभिसले यो फिल्मलाई ओस्कार जित्न सक्ने ‘दुर्लभ ब्लकबस्टर’को रुपमा व्याख्या गरेका छन् ।
‘मलाई फिल्महरु मनपर्छ । मलाई फिल्म बनाउन मनपर्छ, मलाई फिल्मभित्र जान मनपर्छ, मलाई तिनीहरूको बारेमा कुरा गर्न मन पर्छ– एक सिनेफाइलको रूपमा । कान्स सधैं फिल्मको विश्वव्यापी भाषा के हुन सक्छ भन्ने कुराको सर्वोच्च शिखर भएको छ,’ गेर्विगले विज्ञप्तिमा भनेकी छन् ।
‘अपरिचितले भरिएको अँध्यारो थिएटरमा एकदमै नयाँ फिल्म हेर्नु मेरो मनपर्ने ठाउँ हो । कान्स फिल्म फेस्टिभलको निर्णायक मण्डलको अध्यक्षको रूपमा सेवा गर्न पाउँदा म स्तब्ध र रोमाञ्चित छु । हामी सबैको लागि यात्रा कस्तो छ भनेर हेर्न म पर्खिन सक्दिनँ,’ उनले भनेकी छन् ।
गेर्विग कान्समा निर्णायक अध्यक्षको भूमिका निर्वाह गर्ने पहिलो अमेरिकी महिला निर्देशक हुनेछिन् । ४० वर्षको उमेरमा उनी सोफिया लोरेनपछि यो भूमिकामा काम गर्न लागेकी सबैभन्दा कान्छी व्यक्ति पनि हुन्, जो सन् १९६६ मा कान्सको जुरीको अध्यक्षता गर्दा ३१ वर्षकी थिइन् ।
कान्स फिल्म फेस्टिभलको ७७ औं संस्करण आगामी मे १४ देखि २५ सम्म हुनेछ ।
