— इजरायलले गाजामा बन्धक बनाइएका तीन जना कैदीको गल्तीवश मृत्यु भएको भन्दै उक्त घटनाप्रति दुःख व्यक्त गरेको छ । इजरायली सेनाले उक्त घटनालाई लिएर तेल अभिभमा भएको प्रदर्शनप्रति पनि सेनाले खेद व्यक्त गरेको छ ।
इजरायली सेनाका अनुसार योतम हैम, एलन शम्रिज र समर अल–तलालकालाई गाजा सहरको सीमा क्षेत्रमा अपरेसनका क्रममा गोली हानिएको थियो ।
प्यालेस्टिनी लडाकु समूह हमासले असोज २० (अक्टोबर ७) मा इजरायलमा गरेको आक्रमणका क्रममा बन्धक बनाइएका २४० व्यक्तिमध्ये यी तीन जना पनि थिए । उक्त घटनामा नेपाली विद्यार्थी विपिन जोशीलाई पनि हमास लडाकुले बन्धक बनाएर लगेका थिए । जोशीको अवस्था अझै अज्ञात छ । इजरायली रक्षा बलका प्रवक्ता डेनियल हागारीले भने, ‘शेजैयामा भएको लडाइँका क्रममा इजरायली रक्षा बल (आईडीएफ) ले गल्तीले तीन जना इजरायली बन्धकलाई खतराको रूपमा पहिचान गरेको थियो र फलस्वरूप उनीहरूमाथि गोली चलायो र बन्धकहरू मारिए ।’ अनुसन्धानबाट उनीहरू २८ वर्षीय र हेम, २५ वर्षीय एल–तालल्का र २६ वर्षीय शाम्रिज भएको पुष्टि भएको थियो । इजरायली प्रधानमन्त्री बेन्जामिन नेतन्याहुले उनीहरूको मृत्युलाई ‘सहन कठिन दुःखद’ घटना भनेका छन् । ‘सम्पूर्ण इजरायल आफ्नो क्षतिप्रति दुःखी छन्,’ उनले भने । अमेरिकाले पनि यो घटनालाई ‘दुःखद गल्ती’ भनेको छ ।
घटनाको खबर फैलिएपछि तेल अभिभस्थित इजरायलको रक्षा मन्त्रालयमा सयौं मानिस भेला भएका थिए र नेतन्याहुको सरकारलाई हमास शासित क्षेत्रमा रहेका १२९ जना बन्धकको रिहाइका लागि आग्रह गरेका थिए । प्रदर्शनकारीहरूले इजरायलको झन्डा र प्लेकार्ड बोकेका देखिन्थ्यो । ‘हरेक दिन एक जना बन्धकको मृत्यु हुन्छ,’ एउटा प्लाकार्डमा लेखिएको थियो । ‘मलाई डर लागिरहेको छ,’ हमासले बन्धक बनाएक एक महिला इटे स्विस्कीकी बहिनी मेराभ स्विस्कीले भनिन्, ‘हामी अहिले नै बन्धकका लागि सम्झौता गर्नका लागि माग गर्छौं ।’
अघिल्लो महिना अस्थायी युद्धविरामपछि इजरायली जेलमा रहेका केही प्यालेस्टाइनीहरूको बदलामा १०० भन्दा बढी बन्धकहरूलाई हमासद्वारा मुक्त गरिएको थियो । युद्धविराम अन्त्यसँगै लडाइँ फेरि सुरु भएको छ ।
