— अर्थमन्त्री प्रकाशशरण महतले देशको अर्थतन्त्र सुध्रिँदै गएको दाबी गरेका छन् । मंगलबार हेटौंडामा कांग्रेस मकवानपुरको प्रथम जिल्ला सम्मेलनको उद्घाटन गर्दै उनले देशको अर्थतन्त्रमा क्रमशः सुधारका संकेत देखा पर्न थालेको दाबी गरेका हुन् ।
उनले पूर्वप्रधानमन्त्री केपी शर्मा ओलीको समयमा हचुवाको भरमा जथाभाबी गरिएको लगानी, खुकुलो मौद्रिक नीति र अनुत्पादक क्षेत्रमा लिइएको विदेशी ऋणका कारण बिग्रिएको अर्थतन्त्रमा क्रमशः सुधार भइरहेको दाबी गरेका हुन् ।
‘अहिले घुम्नका लागि नेपाल आउने विदेशी पर्यटकको संख्या बढेको छ । रेमिट्यान्स ३० प्रतिशतभन्दा बढी आइरहेको छ,’ उनले भने । शेयर कारोबार र आन्तरिक राजस्व संकलन दैनिक बढिरहेको पनि उनको भनाइ छ । अर्थमन्त्री महतले अब क्रमशः भारतमा बेच्ने विद्युत्को दर पनि बढिरहेको दाबी गरे । ‘अब हामी सरकारी खर्चलाई व्यवस्थित गर्छौ । अनावश्यक क्षेत्रमा भएका खर्च कटौती गर्दै लैजान्छौं,’ उनले थपे ।
उनले मिश्रित निर्वाचन प्रणालीका कारण एकल सरकार निर्माण हुने वातावरण नरहेको दाबी गरे । ‘गठबन्धन बाध्यता हो । निर्वाचन प्रणालीका कारण कुनै पनि दलको एकल बहुमत आउने सम्भावना छैन । त्यसकारण निर्वाचनबाटै गठबन्धन गर्नुपर्ने अवस्था सिर्जना भएको हो,’ उनले भने । कांग्रेसले वडादेखि नै संगठनलाई बलियो बनाउँदै लैजान जरुरी रहेको पनि उनले बताए ।
कांग्रेस मकवानपुर सभापति बुद्ध लामाका अनुसार सम्मेलनले पार्टीको आगामी कार्यदिशा तय गर्नेछ । भेलामा करिब दुई हजार कांग्रेसका प्रतिनिधिहरूको सहभागिता रहेको छ ।
