— नेपाली कांग्रेसका प्रवक्ता एवं अर्थमन्त्री प्रकाशशरण महतले क्षणभरमा महत्त्वाकांक्षा पूरा गर्ने उद्देश्य लिएका राजनीतिक दल दिगो बन्न नसक्ने बताएका छन् । उनले भ्रम पैदा गरेर जनतालाई एक पटक झुक्याउन सकिने, तर त्यो दीर्घकालीन नहुने बताए ।
सोमबार नुवाकोट कांग्रेसको जिल्ला सम्मेलनमा अर्थमन्त्री महतले नागरिकका दु:खसुखमा निरन्तर साथ र समर्थन गर्ने दल कांग्रेस मात्रै भएको दाबी गरे । 'यो हामीले बुझिराखौं, भ्रम पैदा गर्ने राजनीति दल दिगो हुँदैन,' उनले भने ।
उनले सामाजिक सञ्जालमा गालीगलौज भएर उदाएकाहरूसँग कांग्रेस डराउनुपर्ने अवस्था नरहेको जिकिर गरे । ‘अप्ठ्यारो पर्यो भने, अधिकारमाथि आक्रमण भयो भने निरन्तर लागिरहने र धैर्यता भएको राजनीतिक दल नेपाली कांग्रेस नै हो भनेर आम नागरिकलाई हामीले बुझाउनुपर्छ’, उनले भने ‘सामाजिक सञ्जालको जमाना छ, केही मानिसहरू गालीगलौज गरेर आएका छन्, तर डराउनुपर्ने अवस्था छैन । केही गर्नका लागि धैर्यता, जाँगर, समपर्ण र इमान्दारिता चाहिन्छ । त्यो नेपाली कांग्रेसमा मात्र छ ।’
उनले वर्तमान गठबन्धन सरकार आवश्यकताको प्रतिफल भएको दाबी गरे । 'साथीहरूलाई गठबन्धनका बारेमा गलत धारणा बनेको सुनेको छु । तर यसलाई गलत ढंगले बुझ्नु गलत हुन्छ,' उनले भने, 'यो गठबन्धन आवश्यकताको प्रतिफल हो । यो सबैको सहमतिमा गरिएको हो । पार्टी एक्लैले सरकार बनाउन सक्ने अवस्था थिएन, चुनाव जित्ने र बहुमत ल्याउने अवस्था पनि थिएन ।'
मन्त्री महतले एनसेलबारे सरकारले छानबिन समिति बनाएको र समितिले काम गरिरहेको बताए । 'उसले कर छलेको रहेछ भने हामी छोड्दैनौं । तर, किनबेच अर्थमन्त्रालयले हेर्दैन, दूरसञ्चार प्राधिकरणले हेर्छ । त्यसको पनि छानबिन हुँदैछ,' उनले भने ।
