गुगलको मातृ कम्पनी अल्फाबेटले प्ले स्टोरको एकाधिकार सम्बन्धी मुद्दामा ७० करोड डलर अर्थात् करिब ९३ अर्ब रुपैयाँ जरिवाना तिर्ने भएको छ ।
अमेरिकाका ५० वटा राज्य तथा उपभोक्ताहरुले दायर गरेको मुद्दामा ७० करोड डलर क्षतिपूर्ति तिर्न गुगल तयार भएको हो ।
उक्त उजुरीमा एन्ड्रोइड एपस्टोरको बजारमा गुगलले प्रतिस्पर्धा विरोधी अवैधानिक एकाधिकार कायम गरेको, एन्ड्रोइड एपहरुको मूल्य बढाएको, गुगल प्लेका कारोबारमा ३० प्रतिशतसम्म कमिसन लिएको लगायतका अभियोग लगाइएको छ । उक्त मुद्दामा ७० करोड तिरेर मिलापत्र गर्न गुगल सहमति भएको छ ।
यस विषयमा गुगलले गरेको प्रस्ताव अनुसार ६२ करोड ९० लाख डलर रकम उपभोक्ताहरुलाई जानेछ जसले एपहरु खरिद गर्दा वा एपमार्फत् कारोबार गर्दा बढी रकम तिर्नुपरेको थियो ।
त्यस्तै ७ करोड डलर ५० वटा अमेरिकी राज्य तथा १० लाख डलर मुद्दाको प्रशासनिक खर्चका लागि छुट्टाइएको छ ।
त्यस्तै सहमति बमोजिम गुगलले आगामी ७ वर्षसम्म गुगलले एन्ड्रोइड मोबाइलमा गुगल प्ले बाहेकका माध्यमबाट समेत थर्ड पार्टी एपहरु डाउनलोड गर्ने सुविधा दिनेछ ।
त्यस्तै गुगलले नयाँ एन्ड्रोइड फोनमा गुगल प्ले स्टोरको बाध्यकारी प्रिइन्स्टलेसन गर्नेछैन र अन्य एप स्टोरपनि राख्न पाइनेछ ।
गुगलको प्रस्ताव अनुसार एप डेभलपरहरुलाई गुगल प्ले बाट मात्रै सर्वाधिक उत्तम मूल्यको अफर प्रस्तुत गर्न बाध्य पार्नेछैन र एप वितरणमा बढी स्वतन्त्रता प्रदान गर्नेछ ।
