— फुटबलमा यस्तो दृश्य बिरलै देखिन्छ, एउटै टिमका खेलाडीबीच झगडाको स्थिति । झापा एफसीका गोलरक्षक स्टेफन कुपिच र फरवार्ड जोर्गे सान्चेजबीच बुधबारको खेलका क्रममा भनाभन चलेको देखियो । के यो टिमभित्रको चिरा बाहिर ह्वाङ्ग देखिएको हो त ?
नेपाल सुपर लिगमा बुधबार धनगढीविरुद्ध गोल गरेपछिको खुसी, अञ्जन विष्टसहित झापाका खेलाडी । तस्बिर : हेमन्त श्रेष्ठ/कान्तिपुर
‘त्यस्तो होइन, जस्तो बाहिरबाट देखिन्छ,’ झापाका स्पेनी प्रशिक्षक ओरियल मोहेडानोले भने । उनको आशय थियो, यो त टिमलाई अझ आक्रामक बनाउन दुई खेलाडीबीच चलेको सकारात्मक द्वन्द्व पो हो ।
सायद होला । उनको यो दाबी किन पनि विश्वास गर्न सकिन्छ भने झापा टिम नेपाल सुपर लिगमा बुधबार प्रभावशाली जित निकाल्न सफल रह्यो । यो जितले सुपर लिग थप रोमाञ्चक मोडमा पुगेको छ । धनगढीले खेल जितेको भए प्लेअफ खेल्ने निश्चित हुन्थ्यो । तर, हारले टिम ढुक्क हुनसक्ने स्थितिबाट टाढिएको छ । यसपल्टको प्रतियोगितामा धनगढीको यो पहिलो हार हो । अब त्यस्तो कुनै टिम रहेन, जसले आफूलाई अविजित कायम राख्न सक्यो ।
धनगढी ७ खेलबाट १२ अंकसहित दोस्रो स्थानमा छ । टोलीको अन्तिम खेल शीर्षमा रहेको पोखरा थन्डर्सविरुद्ध छ । पोखरा नै यस्तो एकमात्र टिम हो, जसको प्लेअफ खेल्ने निश्चित भइसकेको छ । पोखरासँग १४ अंक छ । झापाको १० अंक भएको छ । यससँगै टोली शीर्ष चारमा उक्लेको छ । झापाको अन्तिम खेल भने एफसी चितवनविरुद्ध हुनेछ । झापा जितेपछि चितवनको अर्को चरण खेल्ने सम्भावना पनि समाप्त भएको छ ।
चितवन प्लेअफको समीकरणबाट बाहिरिने स्पोर्टिङ इलामपछि दोस्रो टिम भएको छ । त्यही खेलमा केन्द्रित भएर प्रशिक्षक मोहेडानोले भने, ‘चितवनको चुनौती समाप्त भए पनि हामी आफ्नो प्रतिद्वन्द्वीलाई पूर्ण सम्मान दिएर खेल्नेछौं । यो हाम्रा लागि कप फाइनलजस्तै हुनेछ ।’ उनले आफ्नो टिमले धनगढीविरुद्ध गरेको प्रदर्शनमा खुसी र गर्व रहेको बताए ।
झापाका कप्तान अञ्जन विष्ट भने फेरि एकपल्ट गम्भीर मुद्रामा मिडियासामु प्रस्तुत भए । उनले गरेको तर्क भने ठीकै थियो । उनको भनाइ थियो, ‘हामी यो जितमा खुसीयाली मनाउने पक्षमा छैनौं, किनभने केही पनि निश्चित भएकै छैन । अहिलेका लागि आफ्नो टिम चौथो स्थानमा पुगेको छ । यसक्रममा हामीले आफ्नो टिम यसको हकदार छौं भनेर भने प्रमाणित गर्यौं ।’ झापाले उनकै गोलले अग्रता लिएको थियो ५३ औं मिनेटमा । छिरिङ लामाले निकालेको क्रसलाई अञ्जनले हेडबाट ‘फ्लिक’ गर्दै गोल गरे । यो आफैंमा आर्कर्षक गोल रह्यो ।
उनले सातौं खेलमा आएर झापाका लागि पहिलो गोल गरेका हुन् । दोस्रो गोल भने ७७ औं मिनेटमा सम्भव भएको थियो । यो गोल सब्स्टिच्युट खेलाडी समिराज थोकरको नाममा रह्यो । सायद सान्चेजले गरेको सुरुआती प्रहार पोस्टको दिशातर्फ अग्रसर थियो । त्यसैलाई समिराजले निश्चित गोलमा परिणत गरे । अञ्जन नै प्लेयर अफ द म्याच रहे । तर तिनै गोलरक्षक कुपिचले दाबी गरेको देखियो, ‘खेलको उत्कृष्ट खेलाडी त म नै हुनुपर्ने हो ।’
उनको दाबीमा ‘दम’ थियो । कुपिचले ‘क्लिन सिट’ राखेको यो लगातार पाँचौं खेल रह्यो । उनले यसै खेलको क्रममा आफू उत्कृष्ट गोलरक्षक रहेको पनि प्रमाणित गरे । उनले पूरा प्रतियोगितामै गोल नखाएको लगातार ५ सय २१ मिनेट पुगेको छ । सम्भवतः घरेलु नेपाली फुटबलमा यो कोही पनि गोलरक्षकको अहिलेसम्मकै सबैभन्दा उत्कृष्ट प्रदर्शन हो । पोखरासँग कुपिचले अन्तिम पटक गोल खाएका थिए । त्यसपछि उनले काठमाडौं, वीरगन्ज, बुटवल–लुम्बिनी र ललितपुर सिटीसँगको खेलमा कुनै गोल खाएका छैनन् ।
खेलको अन्तिम मिनेट झापाले १० खेलाडीमा सीमित रहेर खेलेको थियो । डरलाग्दो ट्याकल गरेका कारण धीरज थतालीले सिधा रातो कार्ड खाए । यसमा उनी भावविह्वल देखिए । अर्कोतर्फ धनगढीका प्रशिक्षक युगलकिशोर राईले पनि हारमा ठूलो मन देखाए । उनले भने, ‘यो खेलमा झापा जितको पूर्णतः हकदार देखियो । झापाले सुरुआती केही खेलमा राम्रो खेल्न सकेन । तर, त्यसपछि उसको प्रदर्शनमा व्यापक सुधार आएको छ ।’
अझ उनले त झापा ७–८ खेलाडीमा सीमित भएको भए पनि हार धनगढीकै हुने समेत बताए । प्रशिक्षक राईले झापाको टिममा अञ्जन फर्केपछि सबै खेलाडीको प्रदर्शनमा सकारात्मक प्रभाव परेको माने । उनले थपे, ‘खेलमा हार जित त हुन्छ नै । आज हाम्रो भागमा हार लेखिएको थियो । अब हाम्रो काम भनेको अन्तिम खेलमा राम्रो गर्ने नै हो । हामीसँग तयारीलाई पर्याप्त समय पनि छैन । पर्सि नै खेल्नु छ । चुनौतीको सामना गर्नु नै एकमात्र विकल्प हो ।’
