— सरकारले उखुको खरिद मूल्य निर्धारण गरेको छ । बुधबार बिहान सिंहदरबारस्थित नयाँ भवनको बैठक कक्षमा बसेको पहिलो मन्त्रिपरिषद् बैठकले उखुको खरिद मूल्य तोकेको हो ।
सञ्चारमन्त्री रेखा शर्माका अनुसार अब उद्योगहरूले प्रति क्विन्टल ५६५ रुपैयाँका दरले उखु खरिद गर्नेछन् भने सरकारले किसानलाई थप ७० रुपैयाँ अनुदान दिनेछ । यसरी किसानले पाउने मूल्य प्रति क्विन्टल ६३५ रुपैयाँ हुनेछ ।
बैठकमा अन्य विषयहरूमा छलफल नभएको र बिहीबार बस्ने नियमित बैठकमै अरू विषयहरूमाथि छलफल हुने सञ्चारमन्त्री शर्माले बताइन् । ‘प्रधानमन्त्रीले कार्यभार सम्हालको एक वर्ष पुग्दैछ, त्यसको तयारीका विषयमा केही छलफल भयो । त्यसपछि कार्यविधि, नियमावली र कार्यशैलीहरूमा सुधार गर्नुपर्ने विषयहरूमा मुख्यसचिवज्यूले छोटो प्रस्तुति गर्नुभयो,’ मन्त्री शर्माले भनिन् ।