— अमेरिकी राज्य कोलोराडोको सर्वोच्च अदालतले संवैधानिक विद्रोहको धारालाई उद्धृत गर्दै डोनाल्ड ट्रम्प राज्यमा अर्को वर्ष राष्ट्रपतिको उम्मेदवार हुन नपाउने फैसला गरेको छ।
अदालतले ४-३ को बहुमतका आधारमा फैसला गर्दै ट्रम्प आगामी राष्ट्रपति निर्वाचनमा कोलोराडो राज्यमा उम्मेदवार हुन अयोग्य ठहर गरेको हो । उनले लगभग तीन वर्ष पहिले अमेरिकी संसद क्यापिटलमा भएको दंगालाई भड्काउन भूमिका खेलेका थिए ।
ट्रम्पको अभियानले उक्त निर्णयलाई लोकतन्त्रविरोधी भन्दै पुनरावेदन गर्ने बताएका छन् । राष्ट्रपति पदका उम्मेदवारलाई अयोग्य ठहराउन अमेरिकी संविधानको १४ औं संशोधनको धारा ३ पहिलो पटक प्रयोग भएको हो।
न्यु ह्याम्पसायर, मिनेसोटा र मिसिगनमा ट्रम्पलाई निर्वाचनमा सामेल हुनबाट रोक्ने यस्तै प्रयास असफल भएका थिए । मंगलबार कोलोराडोको उच्च न्यायालयले गरेको निर्णय अन्य राज्यमा भने लागु हुँदैन । यो निर्णय त्यहाँको न्यायालयले अर्को महिनासम्म पेन्डिङ अपिलका रुपमा राखेको छ ।
यो निर्णय ५ मार्चमा कोलोराडो राज्यमा हुने राष्ट्रपति पदको 'प्राइमरी इलेक्सन' मात्र लागू हुन्छ, जब रिपब्लिकन मतदाताहरूले राष्ट्रपतिको लागि आफ्नो मनपर्ने उम्मेदवार छनोट गर्न मतदान गर्नेछन् । यद्यपि यसले अर्को वर्षको नोभेम्बरमा कोलोराडोमा हुने आमचुनावलाई पनि असर गर्न भने सक्छ।
ट्रम्पका समर्थकहरूले ६ जनवरी २०२१ मा अमेरिकी संसद् 'क्यापिटल'मा आक्रमण गरेका थिए । त्यतिबेला अमेरिकी सांसदहरूले राष्ट्रपति जो बाइडेनको चुनावी जीत प्रमाणित गर्दै थिए।
ट्रम्प अभियानका प्रवक्ता स्टिभन चेउङले उक्त निर्णयलाई 'पूर्ण रूपमा त्रुटिपूर्ण' भन्दै न्यायाधीशहरूको आलोचना गरेका छन् । उनले बाइडेनका असफलतालाई लुकाएर ट्रम्पलाई पुन: राष्ट्रपति हुन नदिन डेमोक्र्याटहरूले सक्दो प्रयास गरिरहेको दाबी गरेकाछन् ।
चेउङले ट्रम्पको कानुनी टोलीले अमेरिकी सर्वोच्च अदालतमा 'छिटो अपिल' गर्ने र त्यहाँ रिपब्लिकन न्यायाधीशहरूको ६-३ को बहुमत रहेकोले तल्लो अदालतको फैसलाले फरक नपर्ने प्रतिक्रिया दिएका छन् ।
