: रुसी सेनामा कार्यरत थप एक जना नेपालीको मृत्यु भएको छ। परराष्ट्र मन्त्रालयले विज्ञप्ति जारी गर्दै थप एक जना नेपालीको मृत्यु भएको जानकारी दिएको छ।
मृत्यु हुनेमा राहदानी नं. ०९४७३६३२ का कुन्दन सिंह नागल रहेका छन्। सरकारले यसअघि रुसी सेनामा कार्यरत ६ जना नेपालीको मृत्यु भएको जानकारी दिएको थियो।
मृत्यु हुनेमा गोरखाका सन्दीप थपलिया, कपिलवस्तुका रुपक कार्की, कस्कीका देवान राई, स्याङ्जाका पितम कार्की, दोलखाका राजकुमार रोका र इलामका गंगाराज मोक्तान रहेका थिए।
सरकारले ज्यान गुमएका नेपालीहरूको शव पठाइदिन आग्रह गरेको छ। मन्त्रालयले नेपालका लागि रुसका राजदूतमार्फत् रुसी सेनामा भर्ना भई निधन भएका नेपालीहरूको शव यथाशीघ्र नेपाल पठाउन र घाइतेलगायत पीडित परिवारलाई क्षतिपूर्ति उपलब्ध गराउन अनुरोध गरेको हो।
सरकारले नेपाली नागरिकलाई रुसी सेनामा भर्ना नगर्न र भर्ना गरिएका नेपाली नागरिकलाई तत्काल नेपाल फर्काउन राजदूतमार्फत् रुसी सरकारलाई आग्रह गरेको छ।
त्यस्तै युक्रेनमा बन्दी बनाइएका चार जना नेपालीको नामसमेत सरकारले सार्वजनिक गरेको छ। बन्दी बनाइनेमा बर्दियाका विवेक खत्री, काभ्रेका सिद्धार्थ ढकाल, मोरङका विकास राई र रोल्पाका प्रतिक पनेरु रहेको परराष्ट्र मन्त्रालयले जनाएको छ। बन्दी बनाइएका नेपालीहरूको शीघ्र रिहाइ गरी नेपाल फिर्ता पठाउन युक्रेनी सरकारलाई कूटनीतिक माध्यमबाट अनुरोध गरिएको मन्त्रालयले जानकारी दिएको छ।
अवैधरूपमा रुसी सेनामा पठाउने गिरोहलाई पक्राउ गरी प्रहरीले अनुसन्धान गरिरहेको छ।
