— बलिउडका लागि नातावाद (नेपोटिज्म) टाउको दुखाइको विषय हो । नातावादले बलिउडमा स्थापित हुने कलाकारलाई त यो विषयले सधैँ पछ्याइरहेकै हुन्छ ।
यो हप्ता अजय देवगनलाई पनि निर्देशक करण जोहरले नातावादको प्रश्न उठाइहाले । यो विषयमाथि वेब सिरिज नै बनाउने घोषणा गरेका करणलाई धेरैले नातावाद भजाउने निर्देशकका रूपमा पनि व्याख्या गर्छन् । करणले नातावादकै विषयमाथि प्रश्न गर्दा अजयले बलिउडमा स्थापित हुन सहज नभएको बताए । साथै, नातावादकै कारण फिल्म क्षेत्रमा आए पनि सबैले बराबर मिहेनत गर्नुपर्ने धारणा राखे ।
'अहिले सामाजिक सञ्जालमा नेपोटिज्मको कुरा जहीँतहीँ देखिन्छ । तर, त्यो स्थानसम्म पुग्न पुस्तौं-पुस्ताले गरेको मेहनत बुझ्दैनन् । त्यहाँ पुग्न सहज छैन नि,' अजय देवगन भन्छन्,'यो स्थापित हुन ३०-३० वर्ष लाग्छ । चाहे तपाईं यो उद्योगको हुनुस् अथवा बाहिरको । सबैको लागि संघर्ष बराबर हुन्छ । त्यसैले सबैले कडा परिश्रम गर्नैपर्छ ।'
आफूले अझै बलिउडमा मिहेनत गरिरहेको उनको दाबी छ । 'हामी अझै मेहनत गर्छौं । मेरा घुँडा मर्कियो तर त्यो मिहेनत हेर्दैनन् । जब रोहित(सेट्टी)सहायक भएर काम गर्दै थियो त्यतिबेला खाना खानलाई समेत उसँग पैसा हुँदैन थियो,'रोहिततर्फ हेर्दै अजयले भने ।
