— 'द एकेडेमी अफ मोसन पिक्चर्स आर्ट्स एन्ड साइन्स'ले ओस्करको ९६ औं सँस्करणको १० विधामा सर्टलिस्ट सार्वजनिक गरेको छ । यो वर्ष बक्स अफिसमा तहल्का पिटेको ग्रेटा गेर्विकको 'बार्बी'ले पाँच विधा ओगट्न सफल भएको छ ।
ध्वनि, ओरिजिनल स्कोर र ओरिजिनल गीतका लागि मात्रै तीन स्थान ओगटेको 'बार्बी' नै सर्टलिस्टमा धेरै उपस्थिति जनाउने फिल्म बनेको छ ।
यो फिल्मले 'मेकअप हेयर'को विधामा पनि उपस्थिति जनाउने अपेक्षा गरिएको थियो । तर, ओस्करको सर्टलिस्टले सबैलाई चकित बनाएको छ । 'द कलर अफ पर्पल', 'गार्जियन्स अफ द ग्यालेक्सी भोल्युम थ्री' भने सर्टलिस्टमै परेन । क्रिस्टोफर नोलनको 'ओपनहाइमर'ले भने तीन विधामा उपस्थिति जनाएको छ । मेकअप एन्ड हेयरस्टाइलिङ, ध्वनि र ओरिजिनल स्कोरतर्फ फिल्मले स्थान बनाएको हो ।
ओस्करलाई यो वर्ष जिम्मी किम्मेलले सञ्चालन गर्ने घोषणा भएको छ । एकेडेमीले सर्टलिस्ट सार्वजनिक गर्दै लेख्यो,'पक्कै हाम्रो रहस्य तपाईंले थाहा पाइसक्नुभयो । ९६ औं ओस्करलाई जिम्मी किम्मेलले होस्ट गर्नेछन्, पुन:स्वागत छ जिम्मी । डकुमेन्ट्री फिचर, डकुमेन्ट्री सर्ट सब्जेक्ट, अन्तर्राष्ट्रिय फिचर, मेकअप एन्ड हेयरस्टाइलिङ, ध्वनि, ओरिजिनल स्कोर, ओरिजिनल गीत, एनिमेटेड सर्ट फिल्म, लाइफ एक्सन सर्ट फिल्म, भिजुअल इफेक्ट्स शीर्षकमा सर्टलिस्ट सार्वजनिक गरिएको थियो ।
