— जुलियन एल्भारेजले गरेको दुई गोलमा म्यानचेस्टर सिटीले शुक्रबार ब्राजिलको फ्लुमिनेसलाई ४-० ले हराउँदै फिफा क्लब वर्ल्डकप जितेको छ । पेप ग्वार्डिओलाको सिटीले युरोपेली च्याम्पियन्स लिग विजेताका रूपमा प्रतियोगितामा सहभागिता जनाएको हो ।
सिटीले खेलको ४० सेकेन्डमै अग्रता लिएको थियो र एल्भारेजले नै गोलको खाता खोलेका थिए । निनोले एक आत्मघाती गोल गरे भने अर्को फिल फोडेनको नाममा रह्यो ।
म्यानचेस्टर युनाइटेड, लिभरपुल र चेल्सीपछि सिटी क्लब वर्ल्डकप जित्ने चौथो इंग्लिस टिम बनेको छ । प्रतियोगिताको तेस्रो स्थानका लागि भएको खेलमा भने इजिप्टको आहलीले जापानको उरवा रेड डाइमन्ड्सलाई ४–२ ले पराजित गर्दै तेस्रो स्थान हात पारेको छ ।
