— पर्यटकीय क्षेत्र सौराहामा मंगलबारदेखि ‘१७ औं हात्ती तथा पर्यटन महोत्सव’ सुरू भएको छ । मंगलबार अर्थमन्त्री प्रकाशशरण महतले उद्घाटन गरेको महोत्सव पाँच दिनसम्म चल्नेछ ।
शनिबार सकिने महोत्सवमा बुधबार हात्ती श्रृंगार प्रतियोगिता, बिहीबार राप्ती नदीमा डुंगा दौड प्रतियोगिता हुने छ । शुक्रबार हात्तीको वनभोज गर्ने कार्यक्रम तय गरिएको छ । बाघमारा मध्यवर्ती वनको चौरमा आयोजना हुँदै आएको महोत्सव यो पटक रत्ननगर नगरपालिका–७ मैनाहाको चित्रसारी पुलनजिक चौरमा आयोजना गरिएको छ ।
विदेशी पर्यटक कम हुने क्रिसमस र अंग्रेजी नयाँ वर्षको सिजनमा सौराहा आउने वातावरण बनाउने उद्देश्यले सन् २००४ मा हाक्ती दौड कार्यत्रम सुरु भएको थियो । त्यसयता हात्ती सम्बन्धित अन्य गतिविधि पनि थपिँदै गएका हुन् । हात्ती दौड हात्तीको स्वभावभन्दा विपरितको कार्यक्रम भएको भन्दै पशु कल्याणको क्षेक्रमा त्रियाशील अधिकारकर्मीले प्रतिवाद गर्न थालेपछि गतिविधि परिमार्जन गरिँदै आएको हो ।
कोरोनापछि लगातार तीन वर्ष रोकिएको यो कार्यक्रम यसपाली फेरि सुरु भएको हो । यो पटक महोत्सवमा हात्तीका लागि सहज हुने गतिविधि मात्रै समावेश गरेको आयोजकले जनाएको छ ।
क्षेत्रिय होटल संघ (हान) चितवन सौराहाले आयोजना गर्दै आएको महोत्सवको मुख्य सहआयोजकमा युनाइटेड हात्ती सञ्चालन सहकारी संस्था र रेष्टुरेण्ट एण्ड बार एसोसियसन चितवन छन् । यसपटक हात्तीका खेल इलाफेण्ट फास्ट वाक, छावाको फुटबल र हात्ती पोलो भने नहुने आयोजकले जानकारी दिएका छन् ।
हात्ती श्रृंगार प्रतियोगितामा माहुतेले राम्रो स्याहार गरेर सफा र स्वस्थ राखेका हात्तीबाट विजेता घोषणा गर्ने क्षेत्रीय होटल संघ चितवन सौराहाका सचिव महेश खनालले बताए । यसमा सात हात्ती सहभागी हुँदैछन् । हात्ती पिकनिकमा हात्तीलाई मनपर्ने खाना र फलफूल राखिने छ । ६० हात्ती लहरै उभिएर खाने छन् । ऊद्घाटन कार्यक्रममा ४० हात्तीको लस्कर सौराहा हुँदै कार्यत्रम स्थलसम्म आएको थियो ।
चितवन राष्ट्रिय निकुञ्ज नेपालमा वन्यजन्तु अवलोकन गर्ने पर्यटकको पहिलो रोजाइ हुने गरेको छ । सौराहा हुँदै अधिकांश पर्यटक निकुञ्ज छिर्ने गर्छन् । त्यसैगरी हात्ती चढेर जंगल घुम्ने पर्यटक सौराहामा खचाखच हुन्छन् ।
हान चितवन सौराहाका अध्यक्ष गंगा गिरी चितवनको पर्यटनको मुख्य आधार नै हात्ती भएको बताउँछन् । निकुञ्जमा गस्तीका लागि पनि हात्तीकाे प्रयोग हुन्छ । निकुञ्जको जंगलमा जंगली हात्तीका बथान पनि छन् । ‘हात्तीको महत्व, विशेषता बुझाउन र पर्यटकलाई मनोरञ्जन दिन पनि यो कार्यक्रम हुँदै आएको हो,’ अध्यक्ष गिरीले भने । सन् २००४ मा पहिलो पटक भएको हात्ती दौडलाई २०१० पछि हात्ती महोत्सवमा रुपान्तरण गरिएको हो ।
