— चालु आर्थिक वर्षको साउनदेखि मंसिरसम्म निजी विद्युतीय सवारी ३ हजार ६८६ वटा आयात हुँदा सार्वजनिक सवारी १९० वटा आयात भएकाे छ । गत वर्ष सोही अवधिमा १ हजार ३५३ वटा नीजि सवारी र सार्वजनिक सवारी ११५ वटा आयात भएको भन्सार विभागले जनाएकाे छ ।
आर्थिक वर्ष २०७७/७८ मा विद्युतीय सार्वजनिक सवारी २६ वटा मात्रै थिए । आर्थिक वर्ष २०७८/७९ मा ८४ पुग्यो । २०७९/८० मा सार्वजनिक विद्युतीय सवारीको संख्या २८१ पुगेको भन्सार विभागकाे तथ्यांक छ । सार्वजनिक विद्युतीय सवारीकाे तुलनामा निजी सवारी साधनको प्रयोग तीव्र रूपमा बढ्दै गएको छ । आर्थिक वर्ष २०७७/७८ मा विद्युतीय कार २४९ वटा भित्रिएका थिए भने २०७८/७९ मा त्यो संख्या बढेर १ हजार ८०७ वटा पुग्यो । २०७९/०८० सम्म ४ हजार ५० वटा निजी विद्युतीय सवारी आयात भएकाे हाे ।
सय किलोवाटभन्दा मुनिका सवारीमा करको दर बढे पनि उपभोक्ताको आकर्षण उस्तै रहेको पाइएको छ । अर्थमन्त्री प्रकाशशरण महतले आर्थिक वर्ष ०८०/८१ को बजेट ल्याउँदै सर्वसाधारणले प्रयोग गर्ने सार्वजनिक सवारीदेखि धेरै उपभोक्ताले खरिद गर्ने ५० किलोवाटसम्मका सवारीमा १० प्रतिशत भन्सार दर यथावत् राखे । तर ५० किलोवाटभन्दा माथिका र सय किलोवाटभन्दा कम क्षमताका सवारीसाधनमा थप ५ प्रतिशत अन्तःशुल्क र १० प्रतिशत भन्सार दर लगाइएको छ । यसअघि १० प्रतिशत भन्सार दर मात्रै थियो । चालु आर्थिक वर्षको साउन र भदौमा सय किलोवाटभन्दा मुनिका सवारीसाधन नै धेरै आयात भएको देखिएको छ ।
सय किलोवाटभन्दा कम क्षमताका सवारीसाधन ३ हजार ६२३ वटा आयात हुँदा सय किलोवाटभन्दा माथिका सवारी ६३ वटा मात्रै आयात भएको विभागले जनाएको छ । साउनदेखि मंसिरसम्म ९ अर्ब १० करोड ६४ लाख रुपैयाँ बराबरको नीजि विद्युतीय सवारी आयात भएको छ । त्यसमध्ये ८ अर्ब ७६ करोड ६७ लाख रुपैयाँको सय किलोवाटभन्दा कमको सवारीसाधन आयात भएको विभागले बताएको छ ।
यस्तै ३३ करोड ९६ लाख ४५ हजार रुपैयाँ बराबरका सय किलोवाटभन्दा माथिका ६३ वटा विद्युतीय सवारी आयात भएका छन् । गत आर्थिक वर्ष सोही अवधिमा ३ अर्ब ६७ करोड १२ लाख रुपैयाँ बराबरका सय किलोवाटभन्दा मुनिका १ हजार ३ सय २० वटा विद्युतीय सवारी आयात भएका थिए । सय किलोवाटभन्दा माथिका १५ करोड ४४ लाख ९६ हजार रुपैयाँ बराबरका ३३ वटा विद्युतीय सवारी आयात भएको विभागको तथ्यांक छ ।
