— पछिल्लो समय चर्चामा रहेका लार्ज ल्यांग्वेज मोडलका च्याटबट तयार गर्न पत्रिकामा छापिएका लाखौं समाचार सामग्री अनुमतीबेगर प्रयोग गरिएको भन्दै अमेरिकी पत्रिका द न्यूयोर्क टाइम्सले ओपेनएआई र माइक्रोसफ्टविरुद्ध मुद्दा हालेको छ ।
प्रतिलिपि अधिकार उल्लंघन भएको विषयमा न्यूयोर्क टाइम्सले बुधबार च्याटजीपीटी र कोपाइलटजस्ता एआई टूल निर्माता ओपेनएआई र ओपनएआईमै लगानी गरेको माइक्रोसफ्टविरुद्ध म्यानहाटन संघीय अदालतमा मुद्दा दायर गरेको न्यूयोर्क टाइम्सले जनाएको छ । न्यूयोर्क टाइम्सले पत्रकारितामा गरेको उल्लेख्य लगानीको च्याटबट निर्माताहरूले ‘फोकटमा फाइदा उठाइरहेको’ भन्दै मुद्दा दायर गरेको हो ।
‘हाम्रा समाचार सामग्रीहरू हाम्रो जानकारीबेगर प्रयोग गरेर हाम्रै उत्पादनको प्रतिलिपि सामग्री तयार गरी हाम्रा पाठकलाई हामीबाट अलग्याउने पहल कुनै पनि हिसाबले रुपान्तणकारी अभ्यास होइन,’ न्यूयोर्क टाइम्सले भनेको छ, ‘हाम्रा महत्वपूर्ण सामग्रीहरू अवैध रूपमा नक्कल गरेर नैतिक एवं वास्तविक क्षति पुर्याएवापत प्रतिवादीहरूलाई अर्बौं डलरको दायित्व बहन गराउनुपर्छ ।’
करिब १७२ वर्षे इतिहास भएको द न्यूयोर्क टाइम्सले आफ्नो प्रतिलिपि अधिकार रहने कुनै पनि सामग्री प्रयोग गरेर तयार गरिएका च्याटबट मोडलको प्रशिक्षण डाटा नष्ट गर्न समेत आह्वान गरेको छ ।
यस विषयमा ओपेनएआईले भने कन्टेन्ट क्रिएटर र त्यसको स्वामित्व भएकाहरूको अधिकारलाई सम्मान गरेको प्रतिकृया दिएको छ । न्यूयोर्क टाइस्मसँगको संवाद सकारात्मक रहेको र रचनात्मक सहकार्यको अपेक्षा गरेको पनि ओपेनएआईले समाचार एजेन्सी रोयर्टससँग भनेको छ । मुद्दा पर्नु आश्चर्यको विषय भएको र त्यसले दु:खी बनाएको ओपेनएआईका अधिकारीहरूको प्रतिक्रिया छ ।
