: नेपाल क्रिकेट संघ (क्यान)ले पूर्व कप्तानसमेत रहेका सन्दीप लामिछानेको विषयमा पुस २५ गतेपछि मात्रै धारणा सार्वजनिक गर्ने भएको छ।
क्यानका सचिव पारस खड्काले सन्दीप लामिछानेको मुद्दाका विषयमा अदालतमा पेसी तोकिएकाले पुस २५ पछि मात्रै क्यानको धारणा सार्वजनिक गर्ने बताए।
काठमाडौंमा बिहीबार आयोजित पत्रकार सम्मेलनमा सचिव खड्काले सन्दीपको भविष्यका विषयमा कानुनी सल्लाहकारको सुझावअनुसार अगाडि बढ्ने बताए।
'सम्मानित अदालतले सन्दीपको विषयमा पुस २५ गते पेसी तोकेको छ। अदालतको ठोस कुरा नआएसम्म हामी केही बोल्दैनौं,' उनले भने, 'अदालतको आदेशपछि क्यानको कानुनी सल्लाहकारको सुझावअनुसार सन्दीपको भविष्यलाई जोडेर क्यान कसरी अगाडि बढ्छ भनेर धारणा सार्वजनिक गर्छौं।'
काठमाडौं जिल्ला अदालतले सन्दीपलाई बलात्कार मुद्दामा दोषी ठहर गरेको थियो। त्यसको सजाय तोक्ने विषयमा भने पुस २५ गते पेसी तोकिएको छ।
