— प्रमुख प्रतिपक्षी दलको बहिष्कारका बीच बंगलादेशमा आज संसदीय निर्वाचन भइरहेको छ । बिहान ८ बजेदेखि सुरु भएको मतदानमा मतदाताहरूको न्यून उपस्थिति रहेको केही बंगलादेशी सञ्चारमाध्यमले जनाएका छन् । द डेली स्टारका अनुसार लगभग आधा समय बाँकी रहँदा मतदाताहरू अपेक्षित रूपमा मतदान केन्द्रमा आएका छैनन् ।
सिल्हेट-६ संसदीय निर्वाचन क्षेत्रअन्तर्गतको पञ्चखण्ड हरगोविन्द स्कुलमा जम्मा २ हजार ५ सय ५ मतदाता रहेकोमा १२ बजेसम्म ३ सय ६९ जनाले मात्र मत हालेका छन् । त्यस्तै अन्य केन्द्रहरूमा पनि मतदान सुरु भएको ४ घण्टा बित्दा १४ प्रतिशत जति मात्र मत खसेको छ । मतदान ५ बजेसम्म चल्नेछ । प्रमुख प्रतिपक्षी सहभागी नभएको चुनावमा पुन: वर्तमान प्रधानमन्त्री शेख हसिनाको पार्टी अवामी लिगले नै जित्ने सहज आकलन गरिएको छ । आइतबार ३ सय सिटका लागि चुनाव हुँदैछ ।
बंगलादेशी जातीय संसद्मा ३५० सांसद हुन्छन् । बाँकी ५० सिट भने महिलाका लागि आरक्षण छुट्याइएको छ । चुनावको नतिजा भने सोमबार बिहानदेखि नै आउने अपेक्षा गरिएको छ । बंगलादेशमा झन्डै १२ करोड मतदाता रहेका छन् । चुनावका लागि ४२ हजारभन्दा बढी मतदान केन्द्र तोकिएको त्यहाँको निर्वाचन आयोगले जनाएको छ । अवामी लिगसहित विभिन्न २७ पार्टी चुनावमा सहभागी छन् ।
राजनीतिक दलबाट १५ सयभन्दा बढी उम्मेदवार छन् भने स्वतन्त्र रूपमा ४ सय ३६ जनाले उम्मेदवारी दिएका छन् । बंगलादेश नेसनल पार्टी(बीएनपी)सहितका १२ दलले चुनाव बहिष्कार गरेका छन् । सन् २०१४ को चुनाव बीएनपीले बहिष्कार गरेको थियो । सन् २०१८ मा बीएनपी चुनावमा सहभागी भए पनि धाँधली भएको भन्दै नतिजा अस्वीकार गरेको थियो । २०१८ मा ३९ दल चुनावमा सहभागी थिए । ३५० सदस्यीय जातीय संसद्मा अवामी लिगकै ३०६ सांसद छन् । प्रमुख प्रतिपक्षी दलका रूपमा रहेको जातीय पार्टीको २७ र जनो फोरमका २ जना सांसद छन् ।
आइतबार पनि सरकारविरोधी दलहरूले प्रदर्शन गरिरहेका छन् । बीएनपीको नेतृत्वमा शनिबारदेखि बंगलादेशव्यापी हडताल आह्वान भएको छ । शुक्रबार रातिदेखि नै विभिन्न मतदात केन्द्रमा विस्फोट र आगजनीका घटनासमेत भएको बंगलादेशी सञ्चारमाध्यमले जनाएका छन् । मतदान केन्द्रमा मतदाताको उपस्थिति बढाउन भन्दै अवामी लिगले कैयौँ 'डमी' उम्मेदवारसमेत उठाएको छ । चुनावअघि हसिना सरकारले प्रतिपक्ष दलका हजारौं कार्यकर्ता पक्राउ गरेको छ ।
मतदान भइरहेकै बेला अवामी लिगका एक जना स्थानीय नेताको हत्यासमेत भएको छ । मुन्सीगन्जका स्थानीय नेता जिल्लुर रहमानको छुरा हानेर हत्या गरिएको अवस्थामा शव फेला परेको डेली स्टारले जनाएको छ । यस पटक चुनावमा बंगलादेशी क्रिकेट कप्तानसमेत रहेका शकिब अल हसन पनि उम्मेदवार बनेका छन् । उनी अवामी लिगबाट मागुरा-१ क्षेत्रबाट उम्मेदवार बनेका हुन् ।
बंगलादेशमा वर्तमान प्रधानमन्त्री शेख हसिना नेतृत्वको अवामी लिग (एएल) २००९ यता सत्तामा छ । प्रमुख प्रतिपक्ष बंगलादेश नेसनल पार्टी (बीएनपी) ले हसिना नेतृत्वको सरकारले निष्पक्ष चुनाव गराउन नसक्ने दाबी गर्दै कामचलाउ सरकार गठनको माग गर्दै आएको थियो । अमेरिका, युरोपेली संघलगायतले पछिल्ला दुई चुनावमा धाँधली भएको बताएका थिए । २०१४ र २०१८ मा हसिना ८४ र ८२ प्रतिशत मतसहित विजयी भएकी थिइन् । यस्तो अवस्थामा पछिल्लो चुनाव पनि निष्पक्ष हुने आधार देखिँदैन । अमेरिका, युके, जापान र अस्ट्रेलियाले स्वतन्त्र, निष्पक्ष र पारदर्शी चुनावका लागि दबाब दिँदै आएका छन् ।
हसिना नेतृत्वमा बंगलादेशमा पछिल्ला वर्षमा अधिनायकवाद हाबी भएको टाइम म्यागेजिनले उल्लेख गरेको छ । पूर्वप्रधानमन्त्री तथा बीएनपी नेतृ खालिदा जियामाथि भ्रष्टाचारको अभियोग लगाइएको छ । बिरामी अवस्थामा रहेकी उनी हाल निवासमा नजरबन्दमा छन् भने उनको दलका कार्यकर्तामाथि मुद्दा लगाइएको छ । स्वतन्त्र पत्रकार र नागरिक समाजका प्रतिनिधिमाथि प्रतिशोधपूर्ण रूपमा कारबाही गर्ने गरिएको टाइमले जनाएको छ । यस्तो अवस्थामा जनवरीमा हुने चुनाव हसिनालाई तानाशाह बन्ने बाटो मात्र भएको आलोचकहरूले दाबी गरेका छन् ।
यद्यपि, हसिनाको कार्यकालमा आर्थिक उपलब्धि भने सकारात्मक नै छ । २००६ मा उनले सत्ता सम्हाल्दा ७१ अर्ब अमेरिकी डलर रहेको देशको कुल गार्हस्थ्य उत्पादन २०२२ मा ४ खर्ब ६० अर्ब पुगेको छ । पछिल्लो समय उच्च प्रविधियुक्त उत्पादका क्षेत्रमा फड्को मारिरहेको बंगलादेश हाल भारतपछि दोस्रो ठूलो एसियाली अर्थतन्त्र हो ।
