— जर्मन फुटबल हस्ती फ्रान्ज बेकनबाउरको ७८ वर्षको उमेरमा निधन भएको छ । जर्मन फुटबल महासंघ (डीएफबी) ले सोमबार राति एएफपीलाई बेकेनबाउरको निधनबारे जानकारी गराएको थियो । उनको निधन आइतबार नै भएको थियो ।
खेलाडी र प्रशिक्षकको रूपमा विश्वकप फुटबल जित्ने ३ व्यक्तित्वमध्ये एक हुन् बेकनबाउर । उनको कप्तानीमा तत्कालीन पश्चिम जर्मनीले सन् १९७४ मा नेदरल्यान्ड्सलाई फाइनलमा पराजित गरी विश्वकप जितेको थियो । उनी प्रशिक्षक रहँदा पश्चिम जर्मनीले १९९० मा अर्जेन्टिनालाई फाइनलमा पराजित गरेको थियो ।
खेलाडी र प्रशिक्षकको रूपमा उपाधि जित्ने अर्का दुई मारियो जगालो र डिडियर डेसच्याम्पस हुन् । जगालोको ९२ वर्षको उमेरमा शुक्रबारमात्र निधन भएको थियो । बेकेनबाउर १९८४ मा पश्चिम जर्मनीको प्रशिक्षक बनेका थिए ।
दोस्रो विश्वयुद्ध सकिएको चार महिनापछि १९४५ जन्मिएका बेकनबाउरले बायर्न म्युनिखलाई जर्मनीको मात्र नभई विश्वकै बलियो क्लबमा उतार्न महत्त्वपूर्ण भूमिका खेलेका थिए । उनले बायर्नबाट १३ वर्ष खेल्दै बुन्डेसलिगाको ४ सय २४ खेलमा सहभागिता जनाएका थिए । उनले यो क्लबबाट तीन जर्मन उपाधि र तीन युरोपियन्स कप जितेका छन् । उनले १९७७ मा पेलेसँगै न्युयोर्क कसमसबाट खेले ।
‘काइजर’ नामले चिनिने उनी पहिला मिडफिल्डर थिए र पछि डिफेन्सिभ स्विपरको भूमिकामा खेले । उनले जर्मन राष्ट्रिय टोलीबाट १ सय ३ खेल खेलेका थिए । उनकै नेतृत्वमा जर्मनीले २००६ को विश्वकप भव्य रूपमा सफल आयोजना गरेको थियो ।
