— उस्ताद राशिद खानको निधन भएको छ । भारतीय शास्त्रीय संगीतका चर्चित कलकार खानको सोमबार निधन भएको भारतीय सञ्चारमाध्यमहरूले जनाएका छन् । उनी ५६ वर्षका थिए ।
लामो समयदेखि उनी प्रोटेस्ट क्यान्सरबाट पीडित थिए । बीबीसी हिन्दीका अनुसार उनी १ महिनाभन्दा बढी समयदेखि कोलकाताको एक अस्पतालमा उपचाररत थिए ।
उस्ताद राशिद खानको जन्म उत्तर प्रदेशको बदायूंमा भएको थियो । उनले सानै उमेरदेखि शास्त्रीय संगीत सिकेका थिए । उनी 'संगीत सम्राट' तानसेन को ३१औं पुस्ताका रूपमा परिचित भएको पनि हिन्दुस्तान टाइम्सले जनाएको छ । 'विलम्बित खयाल'मा महारथ उस्ताद खानले तीन दशकभन्दा बढी समयदेखि शास्त्रीय संगीतप्रेमीलाई मन्त्रमुग्ध पार्दै आएका थिए । उनले सुरुवाती समयमा आफ्नै मावली हजुरबुवा उस्ताद निस्सार हुसेन खानसँग संगीत सिकेका थिए । उनले पद्मश्री, पद्म भूषणका साथै बंगभूषण समेत प्राप्त गरेका थिए ।
उनले 'जब वी मेट' को 'आओगे जब तुम...' र 'माई नेम इज खान' को 'अल्लाह ही रेहम' जस्ता चर्चित गीत गाएका छन् । त्यस्तै उनले 'इश्क', 'मन्टो', 'मौसम', 'कादम्बरी' लगायतका चलचित्रका गीतसमेत गाएका छन् । बडे गुलाम अली खानको रचनामा रहेको 'याद पिया की आये' पनि उनले गाएका छन् जुन धेरैले रुचाएका छन् । पश्चिम बंगालकी मुख्यमन्त्री ममता बनर्जीले उस्ताद खानको निधनमा दु:ख व्यक्त गर्दै हिन्दुस्तानी शास्त्रीय संगीतको महान कलाकार गुमाएको बताएकी छिन् । खानका श्रीमती, दुई छोरी र एक छोरा छन्।
