। प्रिमियर लिग क्लब टोटनहमले जर्मन क्लब आरबी लाइपिजका फरवार्ड टिमो वेर्नरलाई लोनमा अनुबन्ध गरेको छ ।
लण्डन क्लब टोटनहमले २७ वर्षीय वेर्नरलाई मंगलबार लोनमा अनुबन्ध गरेको जनाएको छ । टोटनहमले आगामी समरमा वेर्नरलाई स्थायी रुपमा क्लबमा अनुबन्ध गर्ने विकल्प समेत छ ।
अर्को प्रिमियर लिग क्लब चेल्सीका पूर्व खेलाडी समेत रहेका वेर्नरको आगमनले टोटनहमको फरवार्ड लाइनमा सहयोग पुग्ने विश्वास छ ।
टोटनहमका कप्तान हेउन मिन सन दक्षिण कोरियाबाट एसियन कप खेल्न गएका छन् भने जेम्स म्याडिसन चोटका कारण मैदान बाहिर छन् ।
वेर्नरले टोटनहम पुगेपछि खुशी व्यक्त गर्दै आफू खेल्नका लागि उत्साहित रहेको बताएका छन् । उनले टोटनहाका प्रशिक्षक अन्गे पोस्टेकोग्लुसँग आफ्नो कुरा भएको र त्यो राम्रो रहेको बताए ।
वेर्नरसँग यसअघि चेल्सीबाट प्रिमियर लिग खेलेको अनुभव छ ।
उनी सन् २०२० मा पनि आरबी लाइपजिगबाटै चेल्सी पुगेका थिए । फेरि लाइपजिग फर्कनुअघि उनले चेल्सीका लागि ८९ खेलमा २३ गोल गरेका थिए ।
उनले यस सिजन बुण्डेसलिगामा वेर्नर १४ खेल खेल्दै दुई गोल गरेका छन् । वेर्नरले जर्मनीका लागि ५७ खेल खेलेका छन् ।
