— आगामी वर्षमा नेपालको अर्थतन्त्रमा सुधार आउने विश्व बैंकले प्रक्षेपण गरेको छ । विश्व बैंकले सार्वजनिक गरेको विश्वव्यापी आर्थिक सम्भावना प्रतिवेदनअनुसार आर्थिक वर्ष ०८१/८२ मा नेपालको आर्थिक वृद्धिदर ५ प्रतिशत हुने प्रक्षेपण गरेको हो ।
विश्व अर्थतन्त्रको औसत विस्तारको तुलनामा नेपाली अर्थतन्त्रको वृद्धि तुलनात्मक रूपमा राम्रो रहने प्रक्षेपण विश्व बैंकले गरेको हो । चालु आर्थिक वर्षमा नेपालको आर्थिक वृद्धिदर ३.९ प्रतिशत हुने अनुमान विश्व बैंकले यसअघि नै गरिसकेको थियो । गत आर्थिक वर्ष नेपालको आर्थिक वृद्धि १.९ प्रतिशत रहेको थियो । चालु आर्थिक वर्ष सरकारले ६ प्रतिशत आर्थिक वृद्धिको लक्ष्य तय गरेको छ । तर, यस वर्ष कम्तीमा ५ प्रतिशतभन्दा बढी नै आर्थिक वृद्धि हुने अर्थमन्त्री प्रकाशशरण महतले दाबी गरेका छन् । यस्तै राष्ट्र बैंकले पनि चालु आर्थिक वर्ष ४ देखि ५ प्रतिशतको आर्थिक वृद्धि हुने अनुमान गरेको छ ।
विश्व बैंकले २०२४ मा विश्वव्यापी आर्थिक वृद्धि घट्ने अनुमान गरेको छ । २०२३ मा २.६ प्रतिशत रहेको विश्वव्यापी आर्थिक वृद्धि २०२४ मा २.४ प्रतिशत रहने प्रतिवेदनमा छ । आर्थिक विस्तारका लागि यो दशक परिवर्तनकारी बन्ने अपेक्षा गरिए पनि सुरुका चार आवको वृद्धि ३० वर्षयताकै कमजोर रहेको प्रतिवेदनले औंल्याएको छ ।
सोही अवधिमा विकासोन्मुख देशका आर्थिक वृद्धि ३.९ प्रतिशत कम आय भएका देशका आर्थिक वृद्धि पनि घटेर २०२४ मा ५.५ प्रतिशत हुने अनुमान गरिएको छ । सन् २०२४ मा दक्षिण एसियाली राष्ट्रको आर्थिक वृद्धिमा केही कमी आए पनि माल्दिप्स, श्रीलंका, बंगलादेश, भुटान र पाकिस्तानको आर्थिक वृद्धिदरमा सामान्य सुधार हुने विश्व बैंकको अनुमान छ । आगामी आव भारतको आर्थिक वृद्धि ६.४ प्रतिशत र २०२५/२६ मा ६.५ प्रतिशत पुग्ने अनुमान छ । जबकि २०२३/२४ मा भारतको आर्थिक वृद्धि ६.३ प्रतिशत छ ।
यस्तै, चालु आव बंगलादेशको आर्थिक वृद्धि ५.६ प्रतिशत रहने र आगामी वर्ष ५.८ प्रतिशत पुग्ने अनुमान छ । यस वर्ष माल्दिभ्सको वृद्धिदर ५.२ प्रतिशत रहने र अर्को वर्ष ५.५ प्रतिशत पुग्ने विश्व बैंकले जनाएको छ । यस वर्ष भुटानले ४ प्रतिशत आर्थिक वृद्धि गर्ने र आउँदो वर्ष ४.६ प्रतिशत पुग्ने अनुमान छ ।
यस्तै, श्रीलंका र पाकिस्तानले यस वर्ष समान १.७ प्रतिशतको आर्थिक वृद्धि गर्ने र आगामी वर्ष बढेर समान २.४ प्रतिशत पुग्ने विश्व बैंकको अनुमान छ । २०२४ मा दक्षिण एसियाली क्षेत्रको औसत वृद्धि ५.६ प्रतिशत हुने अनुमान छ । सन् २०२५ मा विश्व अर्थतन्त्रको विस्तार सुस्त हुने पनि अनुमान छ ।
