— गड्डाचौकी नाका भएर भारतबाट नेपाल घर फर्किदै गरेका ३ जनामा कोरोना संक्रमण पुष्टि भएको छ । शनिबार एण्टिजेन परीक्षण गरिएका ७९ मध्ये ३ जनामा संक्रमण पुष्टि भएको हो । गड्डाचौकी हेल्थ डेस्कका इन्चार्ज प्रेमसिंह भण्डारीका अनुसार गड्डाचौकी नाकामा लामो समयपछि पहिलो पटक संक्रमण देखिएको हो ।
उनका अनुसार भारतको हरिद्वार, दिल्ली र पञ्चावबाट आएकाहरुमा संक्रमण देखिएको हो ।
संक्रमण देखिनेमा २ जना कञ्चनपुरको बेलडाडी गाउँपालिका र १ जना भीमदत्त नगरपालिकाका हुन् । उनीहरुलाई होम आइसोलेसनमा बस्ने गरी घर पठाइएको छ । शनिबारदेखि गड्डाचौकी नाकामा परीक्षण बढाइएको हो ।
यसअघिसम्म दैनिक २५/३० जनाको मात्रै परीक्षण भइरहेको थियो । पुस सुरुदेखि नै परीक्षण सुरु गरिएपनि महेन्द्रनगरबाट भारतको दिल्ली र देहरादुनसम्म चल्ने मैत्री बसहरुले नरोक्दा सबैको परीक्षण हुन सकेको थिएन ।
यसैगरि कैलालीको गौरीफण्टा नाकामा पुसयता १८ जनामा संक्रमण देखिएको छ । हेल्थ डेस्कका इन्चार्ज गणेश साउदका शुक्रबार १ जनामा संक्रमण देखिएको थियो । त्यसअघि विभिन्न पटक संक्रमण देखिएको छ । गौरीफण्टा नाकामा दैनिक दुई/अढाइ सय जनाको परीक्षण भइरहेको छ ।
