— पुर्वी नवलपरासीका किसानले आफूहरुले उत्पादन गरेको तरुलले उचित मुल्य नपाएको गुनासो गरेका छन् । अघिल्लो वर्ष प्रति धार्नी १ सय ५० देखि १ सय ८० रुपैयाँसम्म बिक्री गरेका उनीहरुले यसवर्ष विचौलियाका कारण प्रति धार्नी १ सय २० देखि १ सय ४० रुपैयाँमात्रै पाएको गुनासो गरेका छन् ।
बुलिङ्गटार गाउँपालिका-५ का किसान कृष्णबहादुर सारुले यसवर्ष तरुलले भाउ नपाएको गुनासो गरे ।किसानले प्रतिधार्नी १ सय ४० मा बिक्री गर्ने तरुल जिल्लाकै बजारमा खुद्रा प्रति किलो १ सय रुपैयाँमा कारोबार भइरहेको छ । विचौलियाले किसानबाट सस्तोमा खरिद गर्ने र धेरै नाफा राखेर महँगोमा बिक्री गर्ने गर्दा किसान मर्कामा परेका छन्।
पुषको पहिलो हप्ता देखि तरुलको माग उच्च भएको र माघे सक्रान्ति तथा माघी पर्वका लागि काठमाडौँ, नारायणगढ , पोखरा लगायतका बजारमा समेत यहाँबाट तरुलको माग हुने गर्दछ ।
जिल्लाको हुप्सेकोट, बौदीकाली र बुलिङ्गटार गाउँपालिकामा ब्यावसायिकरुपमा समेत तरुल खेती हुँदै आएको छ । पहिले-पहिले घरमा खानका लागि मात्र तरुल लगाउने किसानले अहिले ब्यवसायिकरुपमा खेती गर्ने गरेको कृषि ज्ञान केन्द्रका अधिकृत सुवास कुँवरले बताए ।
पहिले खोरिया फाँडेर बस्ने यहाँका किसानले अहिले तरुल, अम्रिसो, अदुवा लगायतका नगदेबाली लगाएर आम्दानी गरिरहेका छन् । जिल्लामा गतवर्ष ५१ मेट्रिक टन तरुल उत्पादन भएको थियो । यसवर्ष दस प्रतिसतले उत्पादन बढ्ने कृषि ज्ञान केन्द्रको अनुमान छ ।
