। अवार्ड सिजन सुरु भएसँगै हलिउडमा ‘ओपेनहाइमर’को दबदबा पनि सुरु भएको छ । गोल्डेन ग्लोब्सपछि आणविक बम आविष्कारकबारेको यो फिल्मले यस वर्षको क्रिटिक्स च्वाइस अवार्ड जितेको छ ।
फिल्मले सर्वश्रेष्ठ फिल्म, निर्देशक, सहायक अभिनेतासहितका विधामा अवार्ड जित्यो । सर्वश्रेष्ठ कमेडी र गीतसहितका ६ विधामा ‘बार्बी’ले जित दर्ता गर्यो ।
उत्कृष्ट अभिनेत्री विधामा ‘पुअर थिंग्स’बाट एमा स्टोनले अवार्ड जितिन् । पल गियामट्टीले ‘द होल्डओभर्स’बाट सर्वश्रेष्ठ अभिनेताको पुरस्कार जिते । द बियर, सक्सेसन र बीफले टेलिभिजन विधातर्फका प्रमुख विधा जिते ।
क्रिटिक्स र गोल्डेन ग्लोबमा शीर्ष विधा जितेसँगै ‘ओपेनहाइमर’ले ओस्कारमा पनि वर्चस्व स्थापित गर्ने अपेक्षा गरिएको छ । हलिउड रिपोर्टर, भेराइटी लगायतका म्यागजिनले ‘ओपेनहाइमर’ले फिल्म र निर्देशक विधामा अवार्ड जित्ने प्रक्षेपण गरेका छन् ।
क्रिटिक्स च्वाइसमा ‘बार्बी’ले मौलिक पटकथा विधा जित्यो । एडप्टेड स्क्रिनप्ले चाहिं ‘अमेरिकन फिक्सन’ले जित्यो । ओपेनहाइमरले उत्कृष्ट छायांकन र बार्बीले ‘प्रोडक्सन डिजाइन’ विधामा ट्रफी उचाले ।
क्रिटिक्स च्वाइसमा बार्बी सर्वाधिक १३ विधामा मनोनित थियो । सर्वश्रेष्ठ विदेशीभाषी फिल्म विधामा ‘एनाटोमी अफ अ फल’ उत्कृष्ट बन्यो । प्राविधिक विधामा पनि बार्बी र ओपेनहाइमरकै दबदबा देखिएको छ ।
अमेरिकाको सान्टा मोनिकामा आयोजित २९ औं क्रिटिक्स च्वाइस अवार्डको रेडकार्पेटमा दुआ लिपा, ट्रेसी एलिस रस, चाल्र्स मेल्टन, बिली एलिस लगायतका सेलिब्रेटी सहभागी भए ।
