— शहिद लखन गाउँपालिका–६, घैरुङमा माघी पर्वको अवसर पारेर गोरु जुधाइएको छ । यहाँ माघीमा हरेक वर्ष गोरु जुधाइ प्रतियोगिता नै हुने गरेको छ । यसवर्ष १२ हल गोरु जुधाइएको छ । यो वर्ष प्रतियोगितामा भाग लिन धादिङको ज्वालामुखी स्थित रामपुर, भिमसेन थापा र गण्डकी र शहिद लखन गाउँपालिका किसानले गोरु लिएर आएका थिए ।
प्रतियोगितामा शहिद लखन गाउपालिका–९, नाम्जुङकी सावीत्री अंगाईको कालो-सेतो गोरु, सोही ठाउँका नवराज लामिछानेको रातो गोरु र संदिप भुजेलको तारे गोरु प्रथम बनेका छन् । दुई वटा ग्रेड छुट्याएर पुरस्कार वितरण गरिएको आयोजक हिमालय देवी युवा क्लवका कार्यक्रम संयोजक रामवहादुर गुरुङले बताए ।
‘प्रथम बनेका ‘ए ग्रेड’का पाँच वटाले प्रति गोरु धनीले १५ हजार पुरस्कार पाएका छन्,’ उनले भने, ‘ए ग्रेड’ सँग जुधेर उपविजेता बनेका ५ वटा गोरुका धनीलाई १० हजार पुरस्कार दिइएको छ ।'
प्रतियोगितामा सहभागी भएका ‘बी ग्रेड’का ६ वटा गोरुका धनीलाई ८ हजार र ‘बी ग्रेड’बाट द्धितीय बनेका ६ वटा गोरुका धनीलाई ८ हजारले पुरस्कृत गरिएको छ । त्यस्तै, उपविजेता बनेका ६ वटा गोरुले ४ हजार नगद पुरस्कार पाएका छन् ।
१२ हल गोरु मध्ये एक हल गोरु भने नजुधेको गुरुङले बताए । प्रतियोगितामा भाग लिएका गोरु ५ मिनेट देखि एक घण्टा सम्म जुधेका थिए । घैरुङमा गोरु जुधाउने परम्परा १० वर्षअघि देखि सुरु भएको हो ।
‘पछिल्लो समय गोरु पाल्ने किसानको संख्या पनि घट्दै गएको छ, किसानलाई प्रोत्साहनका लागि सघाउन पनि प्रतियोगिताको आयोजना गरेका हौँ,’ संयोजक गुरुङले भने, ‘यही प्रतियोगीतामा भाग लिनकै लागि एक वर्षदेखि किसानले गोरु बलियो बनाएर राख्ने प्रचलन नै बनेको छ ।’
गोरखाको भीमसेन गाउँपालिका-५ को वगुवामा पनि ७ हल गोरु जुधाइएको छ । २० मिनेट भन्दा बढी समय जुधेर भिमसेन थापा गाउँपालिका–४ धावाका विनोद रेग्मीको गोरु पहिलो बनेको छ ।
पहिलो बनेको गोरुका धनीलाई नगद १० हजार पुरस्कार प्रदान गरिएको छ । उत्कृष्ट गोरु जुधाइ प्रतियोगितामा गोरखा नगरपालिका–१ छापथोकका गोरु घनी नेत्रप्रसाद भट्टले नौ हजार पुरस्कार पाए । प्रतियोगितामा भाग लिएका गोरु धनीलाई ८ हजार, ५ हजार, ४ हजार र ३ हजारका दरले पुरस्कृत गरिएको आयोजकले जनाएको छ ।
