— मलेसियाको पुचुङमा रेहेको पीटी स्वीफ्ट मार्केटिङ कम्पनीका आन्दोलित कामदार दूतावास, रोजगारदाता र कामदारबीच भएको त्रिपक्षीय समन्वयमा पुनः काममा फर्किने भएका छन् ।
पुरानो बानेश्वर बत्तिसपुतलीस्थित रिदम ओभरसिजबाट जनही ३ लाख ५० हजारसम्म तिरेर मलेसिया पुगेका ९० जनाभन्दा बढी कामदारहरुमाथि रोजगारदाता कम्पनीले अभद्र व्यवहार गरेको भन्दै स्वदेश फिर्ता गरिदिने धम्की दिएको, क्षमताभन्दा बढी काम लगाएको भन्दै कामदारहरु गत सोमबार दूतावास पुगेका थिए । रोजगारदाताले अभद्र व्यवहार नगरेको र काममा पनि केही हदसम्म सजिलो पार्छु भन्ने मौखिक सम्झौताका आधारमा कामदारहरु काममा फर्किएका थिए ।
पुनः रोजगारदाता कम्पनीले अभद्र व्यवहार गरेको, कम्पनीले भने जति काम गर्न नसक्दा श्रमिकले पाउने मासिक पारिश्रमिकसमेत कटाइदिने गरेको भन्दै आन्दोलित कामदार न्याय माग्दै मंगलबार राजदूतावास पुगेका थिए ।
चराको चारो बनाउने उक्त कम्पनीमा पहिले जनही कार्य समयभित्र १ सय ९० ग्राम पुर्याउनुपर्ने थियो । कुनै पनि तरिकाले काम गर्दा टार्गेट पुर्याउन नसकिने कार्यभार दिएको भन्दै जनही कार्यसमयभित्र १ सय ३० ग्राम टार्गेट पुर्याउनुपर्ने, रोजगारदाताले अभद्र व्यवहार नगर्ने सर्तसहित राजदूतावास क्वालालम्पुरको सभाहलमा रोजगारदाता कम्पनीका मानव संशासन, नियोग उपप्रमुख मुदिता बज्राचार्य, श्रमसहचारी दिलीप श्रेष्ठ, आन्दोलित श्रमिकहरु र गैर आवासीय नेपाली संघ मलेसियाका अध्यक्ष /उपाध्यक्ष विनोद थापा, हेमराज साप्कोटाको उपस्थितिमा मौखिक सम्झौता गरी कामदारहरु काममा फर्किएका हुन् ।
पटक-पटक भएका दुर्व्यवहार र अन्तर्राष्ट्रिय श्रम नियमविपरीत, दुई देशबीच भएको श्रम सम्झौताविपरीत गर्नु परिरहेको काम, विभिन्न खालका मानसिक टर्चर दिएमा कामदारलाई जे गर्दा पनि हुन्छ भन्ने बुझाइ रोजगारदाता कम्पनीको रहेमा वैदेशिक रोजगार विभागमा, मलेसियास्थित लेवर कोडमा समेत उजुर गर्ने बताएका छ्न् ।
