— इरानले पाकिस्तानको बलोचिस्तान प्रान्तमा गरेको क्षेप्यास्त्र आक्रमणमा दुई बालबालिकाको ज्यान गएपछि दुई देशबीच तनाव बढेको छ ।
क्षेप्यास्त्र आक्रमणपछि आक्रोशित पाकिस्तानले इरानको कडा शब्दमा निन्दा गरेको छ । इस्लामावादस्थित विदेश मन्त्रालयले हवाई आक्रमण ‘गैरकानुनी कार्य’ भएको र यसले ‘गम्भीर परिणाम भोग्नुपर्ने’ चेतावनी पनि दिएको छ । पाकिस्तानी विदेश मन्त्रालयले इरानी कूटनीतिज्ञलाई बोलाएर घटनाप्रति विरोधसमेत जनाएको छ ।
इरानले भने मंगलबारको आक्रमण पाकिस्तानी क्षेत्रका विद्रोही समूहलक्षित भएको दाबी गरेको छ । इरानको सरकारी टेलिभिजनले विद्रोही समूह जैश अल–अदललाई लक्षित गरी बलोचिस्तानस्थित दुई क्षेत्रमा आक्रमण गरेको जनाएको हो ।
इरानले एकसातामा विदेशी भूमिमा गरेको यो तेस्रो आक्रमण हो । इरानबाट पाकिस्तानी भूमिमा क्षेप्यास्त्र आक्रमण हुनु लगभग अभूतपूर्व घटना भएको बताइएको छ । यसअघि उसले इराक र सिरियामा हवाई आक्रमण गरेको थियो । इरानले सोमबार साँझ इराकको उत्तरी सहर इर्बिलमा बलिस्टिक क्षेप्यास्त्र आक्रमण गरेको थियो । ६ जनाको मृत्यु भएको आक्रमणको अमेरिकाले त्यस्को निन्दा गरेको थियो । त्यसअघि इरानले सिरियाको उत्तर–पश्चिमी इडलिब प्रान्तमा आक्रमण गरेको थियो ।
गाजा स्ट्रिपमा इजरायल र इरानको समर्थनप्राप्त प्यालेस्टिनी समूह हमासबीचको युद्ध सय दिन नाघेको र यमनमा अमेरिका र यूकेको संयुक्त हवाई हमलाहरू भइरहेका बेला इरानले आक्रमणहरू गरेको हो ।
पछिल्लो घटनापछि चीनले पाकिस्तान र इरानलाई संयमित रहन र तनाव बढ्न सक्ने कार्य नगर्न आग्रह गरेको छ । विदेश मन्त्रालयका प्रवक्ता माओ निंगले दुवै देशलाई चीनले निकट छिमेकीका रूपमा हेरेको बताएका छन् ।
पाकिस्तान र इरानले लामो समयदेखि जैश अल अदल लगायतका विभिन्न पृथकतावादी समूहविरुद्ध लड्दै आएका छन् । अमेरिकी राष्ट्रिय गुप्तचर सेवाका अनुसार जैश अल अदल सिस्तान–बलोचिस्तान क्षेत्रको ‘सबैभन्दा सक्रिय र प्रभावशाली’ सुन्नी उग्रवादी समूह हो ।
पाकिस्तान र इरानबीच करिब ९०० किलोमिटर लामो सीमा छ । त्यसको सुरक्षा व्यवस्थापन दुवै देशका लागि लामो समयदेखिको चिन्ताको विषय रहेको छ ।
