— सुशासनका लागि संसारभर कहलिएको मुलुक सिंगापुरका यातायातमन्त्री सुब्रमण्यम इश्वरनले भ्रष्टाचारको मुद्दा लागेपछि बिहीबार राजीनामा दिएका छन् । सुशासनका लागि कहलिएको मुलुकका मन्त्रीमाथि नै भ्रष्टाचारको मुद्दा लाग्नु दुर्लभ भएको भन्दै अन्तर्राष्ट्रिय सञ्चारमाध्यमहरुले उक्त समाचारको व्यापक कजरेज गरेका छन् ।
उनीमाथि २७ वटा अभियोग छन् । सन् २०२२ को भ्रष्टाचारसम्बन्धि सूचकांकमा सबैभन्दा कम भ्रष्टाचार हुने ५ मुलुकमध्येमा सिंगापुर पनि पर्छ ।मन्त्री इश्वरनले आफूमाथि लागेका आरोपहरुमा दोषी नभएको दाबी गरेका छन् ।
उनीमाथि एक व्यापारी टाइकु ओङ बेङ सेङको व्यापारिक स्वार्थ पुरा गर्न खोजेको आरोप छ । उनले व्यापारीबाट एक लाख ६० हजार सिंगपापुर डलर भन्दा बढीको बढीको उडान, होटलमा बस्न र ग्रान्ड प्रिक्स टिकटहरू उपहार लिएको आरोप छ । उनीमाथि वेस्ट एन्ड म्युजिकल र फुटबल म्याचको टिकट लिएको पनि आरोप छ।
उनले बिहीबार राजीनामाको घोषणा गर्नुका साथै उनले गत जुलाईमा आफ्नो मुद्दाको अनुसन्धान सुरु भएदेखिको तलब र भत्ता पनि फिर्ता गर्ने बताए । सत्तारुढ पिपुल्स एक्सन पार्टी (पीएपी) का उनी धेरै प्रमुख कम्पनीहरूमा निर्देशक भइसकेका व्यक्ति हुन् । सरकारमा रहँदा उनले प्रधानमन्त्रीको कार्यालय, गृह, सञ्चार र पछिल्लो समय यातायात मन्त्रालय सम्हालेका थिए ।
