। क्रिस्टोफर नोलन निर्देशित फिल्म ‘ओपेनहाइमर’ बाफ्टा फिल्म अवार्डमा सर्वाधिक १३ विधामा मनोनयन भएको छ ।
जसमा आणविक बमको पिता मानिने रोबर्ट जे ओपेनहाइमरको रोलमा फिल्म खेलेका अभिनेता किलियन मर्फी समेत छन् । सर्वश्रेष्ठ अभिनेताको विधामा उनी मनोनित छन् ।
ग्रीष्मकालीन बक्स अफिसमा ‘ओपेनहाइमर’सँग प्रतिस्पर्धा गरेको अर्को हलिउड फिल्म ‘बार्बी’ पाँच विधामा मात्र मनोनित छ । अर्को फिल्म ‘साल्टबर्न’सँग ‘बार्बी’को मनोनयन बराबरी छ ।
‘पुअर थिंग्स’ ११ विधामा मनोनित हुँदा ‘किलर्स अफ द फ्लावर मुन’ र ‘द जोन अफ इन्ट्रेस्ट’ समान नौ विधामा मनोनयन भएका छन् । ‘एनाटोमी अफ अ फल’, ‘द होल्डओभर्स’ र ‘माएस्ट्रो’ समान सात विधामा मनोनित छन् ।
नोलनको तीन घण्टा लामो फिल्म ‘ओपेनहाइमर’ले यसअघि आठ विधामा क्रिटिक्स च्वाइस र पाँच गोल्डेन ग्लोब्स अवार्ड जितेको छ । बाफ्टामा पनि यो उत्कृष्ट फिल्म, निर्देशक, एडप्टेड स्क्रिनप्ले लगायतका प्रमुख विधामा मनोनित छ ।
रोबर्ट ड्वेन जुनियर सहायक अभिनेताको विधामा छानिएका छन् । उनी आगामी ओस्कारको लागि पनि दाबेदारको रुपमा छन् ।
यद्यपि, सन् २०२३ मा सर्वाधिक कमाउने र चम्किलो समीक्षा पाएको फिल्म ‘बार्बी’ उत्कृष्ट फिल्मको विधामा मनोनित हुन सकेन । यो फिल्मकी निर्देशक ग्रेटा गर्विग निर्देशन विधामा समावेश हुन सकिनन् ।
‘बार्बी’बाट मार्गेट रोबी उत्कृष्ट अभिनेत्री र रायन गसलिङ सहायक अभिनेताको विधामा मनोनित छन् । नौ विधामा मनोनयन भएको ‘किलर्स अफ द फ्लावर मुन’बाट रोबर्ट डी नीरो सहायक अभिनेताको विधामा छनोट भएका छन् ।
तर निर्देशक मार्टिन स्कोरसिज, अभिनेता लियोनार्दो डिक्याप्रियो र अभिनेत्री लिली ग्लाडस्टोन मनोनयन हुनबाट वञ्चित भए । यसै महिना गोल्डेन ग्लोब्समा उत्कृष्ट अभिनेत्रीको अवार्ड जित्दै ग्लाडस्टोन उक्त पुरस्कार जित्ने पहिलो आदिवासी महिला घोषित भएकी थिइन् ।
बाफ्टा फिल्म अवार्ड आगामी फेब्रुअरी १८ मा लण्डनमा आयोजना हुँदैछ ।
