— अर्जुन कुमालले ९० रनको आकर्षक इनिङ्स खेले पनि न्युजिल्यान्डले आईसीसी यू–१९ विश्वकप क्रिकेटमा नेपाललाई ६४ रनले पराजित गरेको छ । स्नेहिथ रेड्डीले सानदार शतक बनाएपछि दक्षिण अफ्रिकाको इस्ट लन्डनमा टस जितेर ब्याटिङ गरेको न्युजिल्यान्डले निर्धारित ५० ओभरमा ८ विकेट गुमाई ३ सय २ रन बनाएको थियो ।
बुफेलो पार्कमा जवाफमा आएको नेपालले ९ विकेट गुमाई २ सय ३८ रनमात्र बनाउन सक्यो । अर्जुनको इनिङ्स यू–१९ विश्वकपमा नेपाली खेलाडीको दोस्रो उच्च स्कोर हो । प्रदीप ऐरीले सन् २०१२ मा नामिबियाविरुद्ध अविजित ९८ र कनिष्क चौंगाईले २००४ मा पपुवा न्यु गिनीविरुद्ध अविजित ९० रन बनाएका थिए ।
अर्जुनले १ सय १४ बल खेली १२ चौका प्रहार गरे । कप्तान देव खनालले ३४ बल खेली ५ चौका र १ छक्कासहित ३६ रन बनाए । दीपक बोहरा ‘ए’ शुन्य, आकाश त्रिपाठी २, उत्तम थापामगर शुन्य, गुल्शन झा २, दीपक बोहरा ‘बी’ १५, दीपेश कँडेल शुन्य र आकाश चन्द १४ रनमा आउट भए । सुवास भण्डारी र तिलक भण्डारीले दशौं विकेटमा ३७ रनको अविजित साझेदारी गरे ।
सुवास ५२ बल खेली ४ चौका प्रहार गरि ३३ र तिलक १९ बल खेली २ चौका र १ छक्का प्रहार गरि १७ रन बनाई अविजित रहे । न्युजिल्यान्डबाट म्यासन क्लार्कले ३ विकेट लिए । उनले ८ ओभरमा १ मेडन राख्दै २५ रन खर्चे । कप्तान ओस्कार ज्याकसन र इवाल्ड स्रेउडरले २–२ विकेट लिए ।
यसअघि रेड्डीले न्युजिल्यान्डबाट अविजित १ सय ४७ रन बनाए । उनले अन्तिम ओभरमा सुवास भण्डारीलाई दुई छक्कासहित १४ रन बनाए । इनिङ्सको अन्तिम बलमा पनि छक्का प्रहार गरेका उनले कुल १ सय २५ बल खेलेर ११ चौका र ६ छक्का प्रहार गरे ।
न्युजिल्यान्डले १० ओभरमा ५३ रन जोडेर सानदार सुरुआत गरेको थियो । ११ औं ओभरको पहिलो बलमा सुवासले लुक वाटसनलाई १४ रनमा बोल्ड गरि नेपाललाई पहिलो सफलता दिलाए । अर्का ओपनर टोम जोन्सलाई तिलकले ३३ रनमा बोल्ड गरे । उनले ४५ बल खेली ५ चौका प्रहार गरे । ओलिभर तेवाटियालाई दीपेशले शुन्यमा आउट गरेपछि नेपालले खेलमा उत्कृष्ट पुनरागमन गरेको थियो ।
तर रेड्डी र ज्याकसनले चौथो विकेटमा १ सय ५७ रनको साझेदारी न्युजिल्यान्डलाई बलियो स्थितिमा उभ्याए । ज्याकसनले ८१ बल खेली ३ चौका र ५ छक्का प्रहार गर्दै ७५ रन बनाए । गुल्शनले लच्लान स्ट्याक पोल र ज्याक कमिङ्सलाई लगातार बलमा शुन्यमा आउट गरे । एलेक्स थोम्सनले १३ रन बनाउदै रेड्डीसँग आठौं विकेटमा ४९ रनको साझेदारि गरे । नेपालबाट सुवासले ३ विकेट लिए । उनले १० ओभरमा ६० रन खर्चे । गुल्शनले १० ओभरमा ६१ रन खर्चेर २ विकेट लिए । दीपेश, तिलक र आकाशको नाममा १–१ विकेट रहयो ।
नेपालविरुद्ध न्युजिल्यान्डले यू–१९ विश्वकपमा पहिलो विजय हात पारेको हो । नेपालले २००६ को प्लेट फाइनलमा न्युजिल्यान्डलाई १ विकेटको र त्यसको १० वर्षपछि बंगलादेशमा नेपालले समूहचरणको खेलमा न्युजिल्यान्डमाथि ३२ रनको विजय हात पारेको थियो । नेपालले बुधबार पाकिस्तानसँग खेल्ने छ ।
