— इजरायलले सिरियामा गरेको आक्रमणमा इरानको सरकारी फौजका चार वरिष्ठ अधिकारी मारिएका छन् ।
इरानी रेभुलुसनरी गार्डले आक्रमणमा इजरायलको हात रहेको जनाउँदै आफ्ना चारजना सैन्य सल्लाहकार मारिएका जनाएको छ । त्यस्तै, केही सिरियाली फौजका सदस्यहरूको समेत ज्यान गएको बीबीसीले जनाएको छ ।
सिरियन अब्जरभेटरी फर हृयुमन राइट्सले इरानसमर्थित नेताहरूको बैठक भइरहेका बेला इजरायलले चारतले भवनलाई निशाना बनाएर आक्रमण गरेको हो । आक्रमणमा सम्पूर्ण भवन ध्वस्त भएको जनाइएको छ । उक्त भवन रहेको मजेह क्षेत्र सिरियाको राजधानी दमास्कसको दक्षिण–पश्चिममा पर्छ । मजेह क्षेत्रमा संयुक्त राष्ट्रसँगको मुख्यालय, दूतावास र रेस्टुरेन्टहरू पनि छन् । घटनाबारे इजरायलले भने कुनै प्रतिक्रिया जनाइसकेको छैन ।
इजरायलले पछिल्ला वर्षहरूमा सिरियास्थित इरानी समर्थन प्राप्त विद्रोहीका अखडाहरूमा आक्रमण गर्दै आइरहेको छ । पछिल्लो समय गाजा क्षेत्रमा युद्ध चर्किंएसँगै इजरायलले आक्रमण थप तीव्र पारको छ ।
सन् २०११ मा गृहयुद्ध सुरू भएयता राष्ट्रपति बसर अल–असदको शासनलाई सहयोग गर्नका लागि इरानी रेभुलुसनरी फौजका बरिष्ठ अधिकारीहरू सिरियामा छन् । रेभुलुसनरी गार्ड इरानको प्रमुख सैन्य, राजनीतिक र आर्थिक फौज हो ।
गृहयुद्धका क्रममा इजरायलले सिरियामा सयौं हवाई आक्रमण गरेको छ । त्यस्ता आक्रमण खासगरी इरान समर्थित सुरक्षा अधिकारी तथा सिरियाली सेना लक्षित छन् ।
डिसेम्बर अन्त्यमा इजरायली हवाई आक्रमणमा रिभोल्युसनरी गार्डस कर्प्सका बरिष्ठ सल्लाहकार सइद रजी मौसवीको ज्यान गएको थियो । यसअघि २०२० जनवरी ३ मा इराकको बग्दादमा अमेरिकी ड्रोन आक्रमणमा कर्प्सका जर्नेल कासिम सुलेमानी मारिएका थिए । मौसवी सुलेमानीको मृत्युपछि इरानबाहिर मारिएका सबैभन्दा वरिष्ठ कमान्डर हुन् ।
