— द्वन्द्वग्रस्त गाजामा सोमबार एकैदिन २४ जना इजरायली सैनिक मारिएका छन् । इजरायली सेनाका अनुसार मारिनेमध्ये २१ जना जगेडा सैनिक हुन् । उनीहरू एक धराप विस्फोटमा परी मारिएका जनाइएको छ ।
इजरायल डिफेन्स फोर्सेस (आईडीएफ)का अनुसार उक्त विस्फोटक पदार्थ दुईवटा भवन ध्वस्त पार्नका लागि राखिएको थियो ।
प्यालेष्टिनी लडाकुहरूले केहीअघि ती फौजको सुरक्षाका लागि खटिइरहेका सैन्य ट्यांकमा प्रहार गरेको बताइएको थियो । घटनाबारे अनुसन्धान गरिरहेको आईडीएफले जनाएको छ । आईडीएफका मुख्य प्रवक्ता डानियल हगारीका अनुसार ती जगेडा सैनिकहरू इजरायलको दक्षिणी क्षेत्रका बासिन्दालाई सुरक्षित रूपमा घर फर्काउन अवस्था सिर्जना गर्ने कारबाहीमा संलग्न थिए ।
हमासको आक्रमणपछि ती क्षेत्रबाट दशौं हजार मानिसलाई स्थानान्तरण गरिसकिएको छ । त्यस्तै, सोमवार नै दक्षिण गाजामा भएको बेग्लै आक्रमणमा तीनजना सैनिक मारिएका इजरायली सेनाले जनाएको छ । गाजामा हमासले संचालन गरेको स्वास्थ्य मन्त्रालयले सोमबार उक्त क्षेत्रमा एक सय ९५ प्यालिस्टिनी मारिएका जनाएको छ ।
त्यस्तै, गाजाको दक्षिणी सहर खान यूनिसमा रहेका तीनवटा अस्पतालनजिक पनि भीषण लडाईं भइरहेको छ । त्यहा विस्थापित मानिसहरूको निकै ठूलो भिड रहेको बीबीसीले जनाएको छ । खान यूनिसलाई आईडीएफले पूर्ण रूपमा घेरेको जनाइएको छ । उक्त स्थानमा हमास समूहका बरिष्ठ नेताहरू लुकेर बसिरहेका र केही इजरायलीलाई बन्धक बनाइएको इजरायलको दाबी छ ।
अक्टोबर ७ मा हमासले इजरायलविरुद्ध अप्रत्यासित आक्रमण गरेयता गाजा क्षेत्रको अवस्था तनावपूर्ण छ । इजरायली प्रधानमन्त्री बेन्जामिन नेतान्याहुले ‘पूर्ण जित’ हासिल नगरेसम्म लडाईं जारी रहने बताएका छन् ।
अक्टुबरको आक्रमणमा अधिकांश सर्वसाधारणसहित एक हजार तीन सय जनाएको ज्यान गएको थियो । त्यसका साथै, हमासले २ सय ५० जनालाई बन्धक बनाएर लगेका थिए । त्यसयता ५ सय ५२ जना इजरायली सैनिक मारिएका जनाइएको छ । हमासद्वारा सञ्चालित स्वास्थ्य मन्त्रालयका अनुसार इजरायली आक्रमणका कारण कम्तीमा २५ हजार ४ सय ९० जनाको ज्यान गएको छ । तीमध्ये अधिकांश महिला र बालबालिका छन् ।
