— स्वास्थ्य तथा जनसंख्या मन्त्रालयले वीर अस्पतालमा २६१ जना स्वास्थ्य जनशक्ति थप गर्ने तयारी थालेको छ । सोमबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा बोल्दै मन्त्रालयका सचिव देवकुमारी गुरागाईंले वीर अस्पतालमा २६१ स्वास्थ्य जनशक्ति थप गर्ने प्रक्रिया अघि बढेको जानकारी दिइन् ।
उनले केही दिनभित्रै लोकसेवाको सेड्युलबाट विज्ञापन प्रकाशित हुने बताइन् ।
उनले केही समयअघि करारमा रहेका वीर अस्पतालका २२१ जना कर्मचारी हटाइएकोबारे सञ्चारमाध्यममा फरक ढंगले प्रचार गरिएको बताइन् ।
'२२१ करारका कर्मचारीहरु हुन् । उनीहरुलाई कोरोनाको संक्रमण भएको अवधिका लागि मात्रै राखिएको थियो,' सचिव गुरागाईंले भनिन्, 'गत साल नै उहाँहरुसँग करार अन्त्य गर्नुपर्ने थियो । तर स्थायी दरबन्दीमा कर्मचारी माग गर्न ढिला भएका कारण यो वर्ष उहाँहरुको करार अन्त्य गरिएको हो ।'
उनले अहिले दशैँअघि देखि नै ३ सय जना स्वास्थ्य जनशक्ति लोकसेवाबाट सिफारिस भएर काम गरिरहेको बताइन् । समितिको बैठकमा राष्ट्रिय स्वतन्त्र पार्टीका सांसद तोषिमा कार्कीले वीर अस्पतालका २२१ जना करारका कर्मचारीहरु एकै पटक किन हटाउनुपरेको भन्दै प्रश्न गरेकी थिइन् ।
