— एथलेटिको बिलबाओसँग पराजित हुँदै बार्सिलोना स्पेनी कोपा डेल रेबाट बुधबार बाहिरिएको छ । साम मामेसमा भएको क्वार्टरफाइनलमा बिलबाओ ४–२ ले विजयी रहेको हो ।
निर्धारित समयको खेल २–२ को बराबरीमा रहेपछि प्रतिस्पर्धा अतिरिक्त समयमा गएको हो । त्यसमा इनाकी विलियम र निको विलियमले बिलबाओका लागि निर्णायक गोल गरे र टिम सेमिफाइनल पुग्यो ।
अर्को क्वार्टरफाइनलमा मार्लोकाले जिरोनालाई ३–२ ले हरायो । बार्सिलोनासँगै रियल म्याड्रिड पनि कोपा डेल रेबाट बाहिरिसकेको छ । अहिलेको हारले बार्सिलोना प्रशिक्षक ज्याभीमाथि अझ दबाब बढेको छ ।
