। ऋतिक रोशन र दीपिका पादुकोण स्टारर बलिउड फिल्म ‘फाइटर’ शुक्रबार विश्वभर रिलिज हुँदैछ । तर यो फिल्मको प्रदर्शनमा यूएई बाहेक मध्यपूर्वका मुलुकले रोक लगाएका छन् ।
बलिउड फिल्म निर्माता तथा विश्लेषक गिरिश जोहरलाई उध्दृत गर्दै हिन्दुस्तान टाइम्सले जनाएअनुसार अहिलेसम्म ती मुलुकमा प्रतिबन्धको निर्णय कायमै छ । तर प्रतिबन्ध लगाउनुको कारण भने केही खुलाइएको छैन ।
जोहरले ट्वीट गरेका छन्, ‘फिल्मलाई ठूलो धक्का । फाइटरलाई मध्यपूर्वमा प्रदर्शनका लागि प्रतिबन्ध लगाइएको छ । तर यूएईमा भने पीजी-१५ सर्टिफिकेटसँगै रिलिज हुनेछ ।’
स्रोतले पनि फाइटरलाई यूएई बाहेकका मुलुकमा रोक लगाइएको खबरको पुष्टि गरेको उक्त भारतीय समाचार संस्थाले जनाएको छ । यसबारे निर्माताले पनि आधिकारिक रुपमा केही बताएका छैनन् ।
बलिउडको पहिलो एरियल एक्सन भनिएको यो फिल्म नेपालसहितका मुलुकमा भने शुक्रबार प्रदर्शन तयारीमा छ । आईएमडीबीसहितका पोर्टलले यसलाई सन् २०२४ कै बहुप्रतीक्षित फिल्म भएको बताइरहेका छन् ।
सिद्धार्थ आनन्द निर्देशित यो फिल्ममा ऋतिक र दीपिकासहित अनिल कपुर, करणसिंह ग्रोवर र अक्षय ओबरोयको अभिनय छ । नेपाली हलले पनि यो फिल्मको अग्रिम टिकट बिक्री खुला गरेका छन् ।
