— सिरियाली सीमा क्षेत्र जिकैको जोर्डनमा रहेको अमेरिकी शिविरमा भएको ड्रोन आक्रमणपछि अमेरिका आक्रोशित बनेको छ । ड्रोन आक्रमणमा तीन अमेरिकी सैनिकको ज्यान गएको थियो । ३४ सैनिक घाइते भएका जनाइएको छ ।
अमेरिकी राष्ट्रपति जो बाइडनले आक्रमणको बदला दिने चेतावनी दिएका छन् । ‘हामीले जवाफ दिनेछौं,’ बाइडेनले भने । अमेरिकी शिविरमा आक्रमण गर्नेहरूलाई ‘हामीले चाहेको समयमा चाहेअनुसार उत्तरदायी’ बनाउने बाइडेनको भनाइ छ ।
आक्रमणको जिम्मा ‘इस्लामिक रेजिस्टेन्स इन इराक’ नामक समूहले जिम्मा लिएको छ । गत वर्षदेखि सक्रिय यो समूह इरानसँग सम्बन्ध भएका र इराकमा सक्रिय लडाकु समूहहरूको छाता संगठन हो । समूहले यसअघि पनि अमेरिकी सैनिकलाई लक्षित गरी तीन आक्रमण गरेको दाबी गरेको छ ।
उक्त समूहलाई इरानले समर्थन गरेको अमेरिकाको दाबी छ । यद्यपि, इरानले आइतबारको आक्रमणमा आफ्नो कुनै संलग्नता नरहेको जनाएको छ । इरानको विदेश मन्त्रालयका प्रवक्ता नासेर कनानीले अमेरिका र बेलायतले आरोप लगाएजस्तो उक्त समूहलाई इरानले सहयोग नगरेको इरानी सरकारी समाचार संस्था इर्नाले जनाएको छ । इरानप्रति लक्षित आरोप निश्चित राजनीतिक उद्धेश्यले प्रेरित रहेको उनको दाबी छ ।
प्यालेस्टिनी विद्रोही समूह हमासले गत अक्टोबर ७ मा इजरायलमा आक्रमण गरेयता उक्त क्षेत्रमा हवाई आक्रमणमा परेर अमेरिकी सैनिकहरू मारिएको यो पहिलो घटना हो । अमेरिकी सेनाका अनुसार उक्त क्षेत्रका शिविरमा बेलाबखतमा आक्रमणहरू हुने गरेका भए पनि आइतबारको आक्रमण अघिसम्म मानवीय क्षति भएको थिएन ।
