— नेपाली महिला राष्ट्रिय फुटबल खेलाडी सावित्रा भण्डारी'साम्बा'ले फ्रान्सको माथिल्लो डिभिजनको क्लब अन आभान्ट ग्वेङगाम्पबाट खेल्ने निश्चित भएको छ । सावित्राले बिहीबार क्लबसँग औपचारिक रूपमा अनुबन्ध गरेकी हुन् ।
यसअघि उनले इजरायलको हापोएल रानानाबाट खेलेकी थिइन् । फ्रान्सेली क्लबसँग खेल्ने यसै साताको सुरुमा उनी फ्रान्सतर्फ गएकी थिइन् । क्लबले अनुबन्धपछि सावित्राको भिडियो क्लिप पनि सार्वजनिक गरेको छ ।
युरोपेली महिला फुटबलमा फ्रान्सको लिग माथिल्लो स्तरको मानिन्छ । अहिले ग्वेङगाम्प लिग तालिकाको दसौं स्थानमा छ । क्लबले १२ खेलबाट आठ अंक जोडेको छ ।
यसअघि उनले इन्डियन्स वुमेन्स लिगमा सनसनी मच्चाएकी थिइन् । उनले २०२२-२३ को सिजनमा चार ह्याट्रिकसहित २९ गोल गरेर इतिहासमेत रचेकी थिइन् । त्यस्तै लिगमा ३ सिजन खेलेकी साम्बाको नाममा सबैभन्दा बढी गोल गर्ने रेकर्डसमेत रहेको छ । उनले इन्डियन वुमेन्स लिगमा ५९ गोल गरेकी छिन् । उनीपछि ४ सिजन खेलेकी बाला देवीको नाममा ४८ गोल रहेको छ ।
