। रकम भुक्तानीसम्बन्धी वार्ता निष्कर्षविहीन भएपछि विश्वको ठूलो म्युजिक कम्पनी युनिभर्सल म्युजिकले आफ्ना लाखौं गीतलाई टिकटकबाट हटाउने भएको छ ।
यसको अर्थ– अब चिनियाँ एप टिकटकले टेलर स्वीफ्ट, द वीकेण्ड र ड्रेक लगायतका कलाकारको गीतमा पहुँच पाउनेछैन । युनिभर्सल म्युजिकले टिकटकले आफूलाई धम्काएको आरोप समेत लगाएको छ । अन्य सामाजिक सञ्जालकै दरमा भुक्तानी गर्न टिकटकले दबाब दिएपछि युनिभर्सलले यो कदम चालेको बीबीसीले जनाएको छ ।
टिकटकले चाहिं युनिभर्सलले झुटो बयानबाजी गरिरहेको आरोप लगाएको छ । संगीत कम्पनीले आफ्ना गीत सामाजिक सञ्जालमा प्ले भएपछि मात्र रोयल्टी भुक्तानी कमाउँछन् ।
चिनियाँ कम्पनी बाइटडान्सको मातहतमा रहेको टिकटकका एक अर्ब प्रयोगकर्ता छन् । ‘यो भनेको युनिभर्सलको कुल राजस्वको एक प्रतिशत हो,’ स्रोतले भन्यो ।
विश्वको एक तिहाइ संगीतको स्वामित्व लिने युनिभर्सलले कलाकार र गीतकारलाई खुला पत्र लेख्दै टिकटकले संगीतको लागि उचित मूल्य नतिरी संगीतमा आधारित व्यवसाय चलाउन खोजिरहेको उल्लेख गरेको छ ।
युनिभर्सलले उक्त पत्रमा आफू कलाकार र गीतको उचित क्षतिपूर्ति मात्र नभएर टिकटक प्रयोगकर्ताको अनलाइन सुरक्षा र कृत्रिम बौद्धिकता (एआई)का प्रभावलाई लिएर समेत चिन्तित भएको जनाएको छ ।
३१ जनवरीसम्मको सम्झौता सकिएपछि टिकटकलाई आफ्ना संगीत सामग्री दिन बन्द गर्ने युनिभर्सलले जनाएको छ । यसबारे टिकटकले युनिभर्सलले आफ्ना गायक र गीतकारलाई मात्र केन्द्रमा राखेर स्वार्थ प्रदर्शन गरेको तथा यसबाट आफू दुःखी भएको प्रतिक्रिया दिएको छ ।
युनिभर्सलले सामाजिक सञ्जालबाट आफ्ना गीत हटाउन ठूलो कदम चालेको यो पहिलोपटक हो । गत वर्षको जुलाईमा विश्वको तेस्रो ठूलो म्युजिक कम्पनी वार्नर म्युजिक र टिकटकले इजाजतपत्र सम्झौता गरेका थिए ।
