— क्रिकेट विश्वकप लिग २ को पहिलो खेलमै नामिबियासँग ४ विकेटको स्तब्धपूर्ण हार बेहोरेको नेपाल विजय यात्रामा फर्कन आतुर छ । तर, नेपालका लागि यो यात्रा सजिलो हुने छैन । नेपालले एसोसिएट क्रिकेटको शीर्ष टोली नेदरल्यान्ड्ससँग शनिबार खेल्दै छ ।
लिग २ मा नेदरल्यान्ड्सको यो पहिलो खेल हो । नेपाल आएर नेदरल्यान्ड्सले पहिलो पटक एकदिवसीय संरचनाको खेल खेल्दै छ । नोभेम्बरमा भारतमा भएको विश्वकपपछि नेदरल्यान्ड्सले पहिलो पटक ५० ओभरको खेल खेल्न लागेको हो । शीर्ष १२ राष्ट्रसँग २०१९–२३ को सुपर लिगको साइकलमा प्रतिस्पर्धा गरेको नेदरल्यान्ड्स पुनः लिग २ क्रिकेटमै फर्किएको हो ।
पछिल्लो एक वर्षमा सानदार प्रदर्शन गर्दै आएको नेपाललाई नामिबियाले स्तब्ध पारेको थियो । ब्याटिङमा हेलचेक्र्याइँ गरेको नेपाल उक्त खेलमा केवल १ सय ३२ रनमा अलआउट भएको थियो । कीर्तिपुरस्थित त्रिवि क्रिकेट मैदानमा खेलिएको एकदिवसीय अन्तर्राष्ट्रिय क्रिकेटमा नेपालको यो न्युन स्कोर हो ।
नेदरल्यान्ड्ससँगको खेललाई दीपेन्द्रसिंह ऐरी टोलीमा फर्किएका छन् । यूएईमा भइरहेको इन्टरनेसनल लिग ट्वान्टी–२० का लागि उनी दुबईमा गए पनि गल्फ जायन्ट्सले उनलाई ३ खेलमै सहभागी गराएन । गल्फको यात्रा बिहीबार सकिएसँगै दीपेन्द्र शुक्रबार साँझ नेपाल फर्किएका हुन् । दीपेन्द्रविना नेपाली टोलीको संरचनामा गहिरो असर परेको थियो । तर, प्रशिक्षक मोन्टी देसाईले टोलीका १४ जना नै प्लेयिङ ११ लाई सक्षम रहेको दाबी गर्दै आएका छन् ।
नेपालले नामिबियासँगको खेलमा मध्यक्रमका ब्याटर आरिफ शेखलाई पनि खेलाएन । आरिफ र दीपेन्द्र दुवै नेपालको प्लेयिङ ११ मा फर्किने सम्भावना छ । यस्तोमा अनिल शाह र पवन सर्राफले स्थान गुमाउन सक्छन् । देव्रेहाते स्पिनर ललित राजवंशीले नामिबियाविरुद्ध सुरुको २ विकेट लिएको प्रदर्शन हेर्दा सूर्य तामाङ पनि प्लेयिङ ११ मा अटाउन सक्छन् ।
भारतमा विश्वकप खेलेको टोलीका दुई प्रमुख खेलाडी कोलिन अकरमन र पाउल भान मिकरेन काठमाडौं आएका छैनन् । नेदरल्यान्ड्स टोलीमा रहेका ओलिभर इलेनाबस र कायल क्लेइनले एकदिवसीय अन्तर्राष्ट्रियमा ‘डेब्यु’ गर्न बाँकी छ । अलराउन्डरद्वय बास डी लिड र रोइफल भान डेर मर्बीका कारण नेदरल्यान्ड्स निकै बलियो देखिन्छ ।
विकेटकिपर स्कट इडवार्डसको कप्तानीमा नेदरल्यान्ड्सको टोली छ । विश्वकपमा नेदरल्यान्ड्सले दक्षिण अफ्रिका र बंगलादेशमाथि विजय हात पार्दा इड्वार्डसले क्रमशः अविजित ७८ र ६८ रन बनाएका थिए । मिकरेन ४ विकेट लिँदै बंगलादेशविरुद्ध प्लेयर अफ द म्याच बनेका थिए ।
नेदरल्यान्ड्सविरुद्ध नेपालले तीन एकदिवसीय अन्तर्राष्ट्रिय खेलेको छ । २०१८ मा नेपालले पहिलो पटक एकदिवसीय अन्तर्राष्ट्रिय खेल्दा २ खेलको शृंखलामा नेदरल्यान्ड्स र नेपालले १–१ खेल जितेका थिए । जुनमा दक्षिण अफ्रिकामा भएको विश्वकप छनोटमा नेदरल्यान्ड्सले नेपाललाई ७ विकेटले पराजित गरेको थियो । नेपालले १ सय ६७ रनमात्र बनाउन सकेको उक्त खेलमा ७५ बलमा ९० रन बनाउँदै म्याक्स ओ डोड प्लेयर अफ द म्याच बनेका थिए ।
