— युरोपेली च्याम्पियन्स लिगको अन्तिम १६ को पहिलो लेगमा पेरिस सेन्ट जर्मेन (पीएसजी) र लाजियोले बुधबार आ–आफ्नो घरमा जित निकालेका छन् । केयलिन एमबापेले गोलको खाता खोलेपछि पीएसजीले रियल सोसिडाडलाई २–० ले हरायो । फ्रान्सेली च्याम्पियनका लागि ब्राडली बारकोलाले दोस्रो गोल थपे ।
पीएसजीले अहिलेसम्म च्याम्पियन्स लिगको उपाधि जित्न सकेको छैन् र सोसिडाडविरुद्ध पनि उसको खेल राम्रो रहन सकेन् । अर्को खेलमा लाजियोले जर्मन च्याम्पियन बायर्न म्युनिखलाई १–० ले हरायो । बायर्न खेलको अन्त्यमा १० खेलाडीमा सीमित रहेको थियो । उपामेकानोलाई रातो कार्ड देखाइएको हो ।
पछिल्लो पाँच दिनमा बायर्नको यो दोस्रो हार हो । यसअघि बुंडेसलिगामा उसलाई बायर लेभरकुजनले ३–० ले हराएको थियो । लाजियोको जितमा भने किरो इमोबाइलले पेनाल्टीबाट ६९ औं मिनेटमा निर्णायक गोल गरे । छ पल्टको विजेता बायर्नसामु एक गोलले पछाडि रहेको स्थिति उल्टाउने अवसर भने दोस्रो लेगको खेलमा हुनेछ ।
