— संयुक्त राष्ट्र संघ (यूएन) का महासचिव एन्टोनियो गुटेरेसले नेपालबाट बिहीबार भएको विश्व सामाजिक मन्चको उद्घाटन समारोहमा सन्देश पठाएका छन् । महासचिव गुटेरसले सन्देशमा एकता र सहयोगको भावनामा सँगै आएकोमा मन्चमा आएका सबैलाई धन्यवाद दिएका छन् ।
‘विश्व सामाजिक मन्चले आवाज उठाउन, सबैभन्दा कमजोरमा ध्यान केन्द्रित गर्न, आशा पुर्नस्थापित गर्न र मानिसहरू तथा ग्रहका लागि नवीन समाधानहरू खोज्न महत्वपूर्ण ठाउँको प्रतिनिधित्व गर्दछ,’ उनले सन्देशमा भनेका छन् ।
महासचिव गुटेरेसले द्वन्द्व र भूराजनीतिक विभाजन बढ्दै जाँदा साझा हितका लागि एकता महत्वपूर्ण रहेको उल्लेख गरेका छन् । ‘हामीलाई दिगो विकास लक्ष्यहरू उद्धार गर्न विश्वव्यापी एकता चाहिन्छ । र, पुरानो, निष्क्रिय र अनुचित विश्वव्यापी वित्तीय प्रणालीलाई सुधार गर्न एकता आवश्यक छ,’ उनले भनेका छन् ।
महासचिव गुटेरसले हामीले जलवायु संकटलाई सम्बोधन गर्न पनि एकजुट हुनु पर्ने उल्लेख गरेका छन् । ‘मेरो हालैको नेपाल भ्रमणको क्रममा मैले देखेको छु, जलवायु परिवर्तनको अग्रपंक्तिमा रहेका देशहरूलाई अझ बढी सहयोगको आवश्यकता छ,’ उनले भनेका छन्,‘मेरो जलवायु एकता सम्झौताले ठूला उत्सर्जनकर्ताहरूलाई उत्सर्जन घटाउन थप प्रयासहरू गर्न र धनी देशहरूलाई उदीयमान अर्थतन्त्रहरूलाई त्यसो गर्न सहयोग गर्न आग्रह गर्दछ ।’
महासचिव गुटेरेसले हामीले समुदायहरू भित्र एकताबद्ध हुनै पर्ने बताएका छन् । उनले विश्वास, न्याय र समावेशीतामा आधारित, र मानवअधिकारमा आधारित नवीकरण गरिएको सामाजिक सम्झौताको साथमा एकताबद्ध हुनु पर्ने उल्लेख गरेका हुन् ।
उनले सन्देशमा भनेका छन्,‘निर्णय गर्ने टेबुलमा महिला, युवा र सीमान्तकृत व्यक्तिको सिट हुनुपर्छ । शान्ति, मर्यादा र दिगो विश्व मात्र सम्भव छैन, आवश्यक छ ।’
