— कमजोर बलिङ र फिल्डिङपछि नेपालको महिला एसिया कप क्रिकेटमा छनोट हुने सम्भावना समाप्त भएको छ । नेपाल शुक्रबार एसीसी वुमन्स प्रिमियर कप क्रिकेटको सेमिफाइनलमा मलेसियासँग ४ विकेटले पराजित भएको थियो । प्रतियोगिताको शीर्ष दुई टोली एसिया कपमा छनोट हुने प्रावधान थियो । तर, नेपाल फेरि एक पटक सेमिफाइनलमै रोकियो ।
टस जितेको नेपालले मलेसियाको क्वालालम्पुरस्थित वायुमास ओभलमा निर्धारित २० ओभर खेल्दै ६ विकेट गुमाई १ सय १५ रन बनायो । नेपालको यो स्कोर मजुबत देखिएको थियो । यही मैदानमा शुक्रबार नै भएको पहिलो सेमिफाइनलमा यूएईले पहिला ब्याटिङ गरी ७ विकेट गुमाई ७० रनमात्र बनाउन सके पनि एसोसिएटको निकै बलियो टोली थाइल्यान्डसँगको खेल ४ रनले जितेको थियो ।
तर ब्याटिङलाई बढी नै केन्द्रित गर्दा नेपालको बलिङ कमजोर हुन पुग्यो, जसको कारण मलेसियाले १ बलअगाडि लक्ष्य पूरा गर्यो । प्रमुख बलरका रूपमा रहेका अलराउन्डरद्वय पूजा महतो र अस्मिना कर्माचार्यलाई प्लेयिङ ११ मा नखेलाउने नेपालको निर्णय निकै घातक बन्यो । फिल्डिङ नेपालको झनै खराब रह्यो । हातमै आएको ग्राउन्ड बल राम्रोसँग नसमात्दा मलेसियाले मजाले २ रनहरू लिइरहेको थियो ।
इल्सा हन्टरले उत्कृष्ट इनिङ्स खेल्दै नेपाललाई निराश बनाइन् । प्लेयर अफ द म्याच उनले ५३ बल खेल्दै ६ चौकासहित अविजित ६९ रन बनाइन् । ट्वान्टी–२० अन्तर्राष्ट्रियमा यो उनको उच्च स्कोर हो । यसै प्रतियोगितामा इल्साले बहराइनविरुद्ध ६८ रन बनाएकी थिइन् । यो उनको तेस्रो अर्धशतक थियो ।
इल्साको प्रयासमा मलेसियाले अन्तिम ४ ओभरमा ३६ रन जोडेर निकै रोमाञ्चक पारामा खेल जितेको थियो । अन्तिम दुई ओभरको समीकरणमा मलेसियालाई १८ रन बनाउनुपर्थ्यो । अन्तिम ओभरमा मलेसियालाई विजयनिम्ति ११ रन चाहिँदा कविता कुँवरको बलिङमा सबै रन इल्साले बटुलेकी थिइन् । अन्तिम ओभरको पहिलो र तेस्रो बलमा इल्साले चौका प्रहार गरिन् । पहिलो १० ओभरमा ४२–३ को स्थितमा रहेको मलेसियाले त्यसपछि १० ओभरमा ७४ रन जोडेको थियो ।
मलेसियाबाट मास इलिसाले १३, माहिराही स्माइलीले १६ र वान जुलियाले ११ रन बनाए । नेपालबाट कविता जोशी र सीता रानामगरले २–२ विकेट लिएका थिए । सीताले फालेको १८ औं ओभरमा मलेसियाले १२ रन जोडेको थियो, त्यसमा इल्साले ११ रन बटुलिन् । कविताले ३ ओभरमा १७ र सीताले ४ ओभरमा २७ रन खर्चिएका थिए । रुबिना क्षेत्रीले ४ ओभरमा १९ र कविता कुँवरले ३.५ ओभरमा २५ रन खर्चेर १–१ विकेट लिए ।
नेपालले सन् २०१२ र २०१६ मा गरी दुई पटक एसिया कप खेलेको छ । त्यसयता छनोट आधार रहेको एसीसीको क्षेत्रीय प्रतियोगितामा नेपाल सधैं सेमिफाइनलमा रोकिँदै आएको छ ।
यसअघि नेपालको सुरुआत राम्रो थिएन । नेपालले पावर प्लेको ६ ओभरमा १८ रनमात्र बनाउन सक्यो । सीता १३ बलमा ६ रन जोड्दै रनआउट भइन् । कविताले ३१ बलमा २ चौकासहित २३ रन जोडिन् । कप्तान इन्दु बर्मा र पूर्व कप्तान रुबिनाले तेस्रो विकेटमा ३१ बल खेल्दै ३२ रन जोडे । इन्दु ३७ बलमा २ चौकासहित २९ रन बनाइन् । रुबिनाले १८ बलमा २ चौकासहित २० रन बनाइन् ।
डली भट्टको आक्रामक इनिङ्सपछि नेपालले १ सय रन कटाएको थियो । लगातार दुई छक्का प्रहार गरेकी उनले १४ बलमा २५ रन बनाइन् । कविता जोशी (२) र डली इनिङ्सको अन्तिम दुई बलअघि रनआउट भइन् । मलेसियाबाट स्माइलीले २ र विनिफ्रेड दुराइसिंगमले १ विकेट लिएका थिए ।
