— अर्थमन्त्री प्रकाशशरण महतले नेपालमा क्लिन र ग्रिन ऊर्जा भएका कारण विश्वको ध्यान आकर्षित रहेको बताएका छन् । शुक्रबार इप्पानले आयोजना गरेको जलविद्युत बीमा नीति र दृष्टिकोण कार्यक्रममा अर्थमन्त्री महतले नेपालमा जलविद्युत उत्पादनको ठूलो सम्भावना रहेकोप्रति कम बहस भएको बताए ।
उनले उर्जा क्षेत्रको भविष्य सुनौलो रहेकोमा सरकार र लगानीकर्ताहरुको ध्यान नपुगेको बताए । मन्त्री महतले पछिल्लो समय दक्षिण एशियाका देशहरुमा समेत जलविद्युत उत्पादनप्रति उत्साह वृद्धि भएको दाबी गरे । उनले भारत लगायत बाहिरी लगानीकर्ताको आकर्षण समेत जलविद्युत क्षेत्रमा बढिरहेको भन्दै उर्जा क्षेत्रलाई अघि बढाउँदा मुलुकमा आर्थिक समृद्धि र युवाहरुलाई रोजगारी सिर्जना गर्न सकिने बताए ।
उनले कार्वन उत्सर्जनलाई न्युनीकरण गर्ने लक्ष्यलाई नेपालबाट सानो योगदान हुने भन्दै अन्तर्राष्ट्रिय समुदाय र क्षेत्रीय देशहरु पनि सकारात्मक देखिएको बताए । उनले नेपाल भित्र २०४६ सालपछि जलविद्युत सम्बन्धी खुला नीतिसँगै निजी क्षेत्रलाई प्रवेश गराउँदा अहिले ठूलो आयोजनामा समेत लगानी गर्नसक्ने अवस्था सिर्जना भएको बताए ।
उनले जलविद्युतको क्षेत्र समस्यारहित नभएको भन्दै यस क्षेत्रका समस्या समाधान गर्न सरकारले कोशिस गरिरहेको धारण राखे ।
‘नेपालमा विद्युत उत्पादनको ठूलो सम्भावना छ । क्लिन र ग्रिन ऊर्जा भएको हुनाले विश्वको ध्यान नेपालमा केन्द्रित भएको छ । दक्षिण एसिया क्षेत्रमा पनि ऊर्जा प्रतिको आकर्षण वृद्धि भएको छ,' उनले भने, ' कार्वन उत्सर्जनलाई न्युनीकरण गर्ने लक्ष्य छ । त्यसमा नेपालबाट सानो योगदान हुनसक्छ भन्ने हिसाबले अन्तर्राष्ट्रिय समुदाय र क्षेत्रीय देशहरु पनि सकारात्मक देखिएका छन् ।'
