। यही फागुन १८ देखि २७ गते (मार्च १-१०) सम्म नेपालमा हुने साफ महिला यु-१६ च्याम्पियनसिपका लागि नेपालको टोली घोषणा भएको छ । मुख्य प्रशिक्षक चक्र तामाङले शनिबार २३ सदस्यीय टोली घोषणा गरेका हुन् ।
नेपाल, भारत, बंगलादेश र भुटान गरी दक्षिण एसियाका चार राष्ट्र सहभागी हुने च्याम्पियनसिप ललितपुरस्थित च्यासल रंगशालामा हुनेछ ।
प्रतियोगिताको उद्धघाटन खेल भारत र भुटानबीच फागुन १८ गते हुनेछ । घरेलु टोली नेपालले आफ्नो पहिलो खेल फागुन १९ गते बंगलादेशसँग खेल्नेछ । यस्तै नेपालले फागुन २१ गते भुटान र फागुन २४ गते भारतसँग खेल्नेछ ।
लिग चरणले सबै टोलीले एक आपसमा खेलेपछि शीर्ष दुईमा रहने टोलीबीच उपाधिका लागि फाइनल खेल हुनेछ ।
च्याम्पियनसिपको यो छैटौं संस्करण हो । यसअघि यो प्रतियोगिता यू-१५ र यू-१७ को नाममा हुँदै आएको थियो भने यस पटक यू-१६ फर्म्याटमा हुन लागेको हो ।
सन् २०१७ मा यू-१५ को नामबाट सुरु भएको यस प्रतियोगिताको चौथो संस्करणमा नेपालले उपाधि जितेको थियो । २०२३ मा पहिलो पटक यू-१७ च्याम्पियनसिप हुँदा भने नेपाल चौथो भएको थियो । जहाँ आमन्त्रित टोलीको रुपमा सहभागी भएको युरोपियन राष्ट्र रुसले उपाधि जितेको थियो ।
२०२२ मा नेपालले उपाधि जित्दा टिममा रहेकी भूमिका बुढाथोकी यस पटक पनि नेपाली टोलीमा छन् ।
नेपाली टोली
गोलकिपर : झरना डुम्राकोटी, सुनिता स्याङ्तान, लक्ष्मी ओली
डिफेण्डर : दिक्षा रायमाझी, रेजिना लामा, मीना चन्द, कृतिशा तामाङ, अंशु विक, मीनमाया श्रेष्ठ, एलिजा विक, ज्ञानुडोल्मा लो
मिडफिल्डर : भूमिका बुढाथोकी, आशिका कार्की, बबतिका कार्की, आयुषा रेउले, डिकीकुमारी स्याङ्बो तामाङ, आयुषा गुरुङ, रविना विक, सबिना तामाङ
फरवार्ड : पूजा गिरी, अनिता रानामगर, यमकुमारी विक, पूर्णिमा थारु ।
