— यसस्वी जैसवालको अविजित दोहोरो शतकको मद्दतले भारतले आइतबार आफ्नो अहिलेसम्मकै सबैभन्दा ठूलो टेस्ट जित आत्मसात् गरेको छ । उसले इंग्ल्यान्डलाई तेस्रो टेस्टमा ४ सय ३४ रनले हराएको हो । यससँगै भारत पाँच टेस्टको सिरिजमा २–१ ले अगाडि रह्यो ।
जितका लागि ५ सय ५७ रनको लक्ष्य पाएको इंग्ल्यान्डको ब्याटिङ तासको पत्तिझैं एकपछि अर्को ढलेको थियो । टेस्टको चौथो दिन इंग्ल्यान्ड १ सय २२ रनमै अलआउट भयो । दिनको अन्तिम सेसेनमा इंग्ल्यान्डले आठ विकेट गुमाएको थियो ।
प्रभावशाली जितपछि जैसवालले भने, ‘टेस्ट क्रिकेटमा जति बेला राम्रो खेलिरहेका हुनेछौं, त्यही बेला त हो, ठूलो स्कोर बनाउने । टेस्ट क्रिकेट आफैंमा कठिन छ । त्यसैले जति बेला म खेलिरहेको हुनेछु, आफ्नो शतप्रतिशत दिने प्रयास गर्नेछु ।’
रवीन्द्र जडेजाले मार्क उडलाई ३३ रनमा आउट गरे र यो नै अन्तिम विकेट रह्यो । जडेजाको आफ्नै भने यो यस इनिङ्सको पाँचौं विकेट रह्यो । रनका आधारमा अहिलेसम्मकै सबैभन्दा ठूलो अन्तरको जित सम्भव भएपछि जडेजाले पिचलाई झुकेर चुम्बन गरे । इंग्ल्यान्डका लागि भने यो अहिलेसम्मकै दोस्रो ठूलो अन्तरको हार हो । यसअघि सन् १९३४ मा इंग्ल्यान्ड अस्ट्रेलियाको हातबाट ५ सय ६२ रनले पराजित भएको थियो ।
इंग्ल्यान्डले चिया सेसन अगाडि नै आफ्ना दुवै ओपनरलाई गुमाएको थियो । त्यसमा अघिल्लो इनिङ्समा शतक बनाएका बेन डकेट चार रन मात्र बनाएर रनआउट भए । त्यसपछि जडेजाले आफ्नो बायाँ हाते स्पिन आक्रमणको मद्दतले इंग्ल्यान्डको मध्यक्रमलाई ध्वस्त पारे । उनी नै प्लेयर अफ द म्याच भए । पूरा टेस्टमा उनले सात विकेट लिए ।
त्यस्तै उनले भारतको पहिलो इनिङ्समा १ सय १२ रनको सानदार शतकीय प्रदर्शन पनि गरेका थिए । इंग्ल्यान्डका लागि खराब लयबाट गुज्रिरहेका जोनी बियरस्टो र जोए रुट दुवै फेरि एकपल्ट असफल रहे । बियरस्टोले चार रन मात्र बनाए भने रुटको ब्याटबाट सातै रन मात्र निस्क्यो । कप्तान बेन स्टोक्सले भारतीय बलिङ आक्रमणविरुद्ध आक्रामक रहेर धावा बोल्ने प्रयास गरे पनि उनी आफ्नो सयौं टेस्टमा १५ रन बनाएर बायाँ हाते स्पिनर कुलदीप यादवको सिकार बने । हारपछि स्टोक्सले भने, ‘अब हामी सिरिजमा २–१ ले पछाडि पर्यौं । तर अझै दुई टेस्ट बाँकी छन् । अब हामी यो खेललाई बिर्सन चाहन्छौं । हामीलाई अबको बाँकी दुई टेस्ट नै जित्नुपर्नेछ, यदि सिरिज पनि आफ्नो नाममा लेखाउने हो भने ।’
बायाँ हाते ओपनर जैसवालले दोहोरो शतक बनाएपछि भारतले चार विकेट गुमाएर ४ सय ३० रनमा आफ्नो दोस्रो इनिङ्सको समाप्ति घोषणा गरेको थियो । त्यसमा २ सय ३६ बलको सामना गरेर २ सय १४ रन बनाएका जैसवालले अघिल्लो दिन रिटायर्ड हर्ट भएयता फेरि खेल्न सुरु गरेका थिए । त्यति बेला उनी १ सय ४ रनको स्थितिमा थिए । ढाडको समस्याले उनले त्यति बेला क्रिज छाडेका थिए । ‘आज म फेरि फर्कें किनभने खेललाई आफैं अगाडि बढाउन चाहन्थें र अन्त्यसम्म ब्याटिङ गर्न चाहन्थें,’ उनले थपे ।
रुटको बलमा एक रन बटुल्नै उनले सिरिजमा लगातार दोस्रो दोहोरो शतक पूरा गरे र उफ्रिँदै खुसी मनाए । उनले १२ छक्का प्रहार गरे । यसमा जेम्स एन्डरसनविरुद्ध लगातार तीन छक्का पनि सामेल थियो । इंग्ल्यान्डका लागि १ सय ८५ टेस्टमा ६ सय ९६ विकेट लिएका भेट्रान एन्डरसनले लगातार तीन बलमा छक्का खाएको यो नै पहिलो पटक हो । जैसवालले टेस्टको एकै इनिङ्समा १२ छक्काको प्रदर्शन पनि बराबर गरेका छन् ।
यसअघि वासिम अक्रमले सन् १९९६ मा जिम्बावेविरुद्ध एकै इनिङ्समा १२ छक्का प्रहार गरेका थिए । जैसवालले डेब्यु गरिरहेका सरफराज खानसँग नटआउट १ सय ७२ रनको म्याराथन साझेदारी पनि गरे । खानले आफ्नो दोस्रो अर्धशतक पूरा गर्ने क्रममा ६८ रन बनाए । दोस्रो टेस्टमा पनि जितका लागि निर्णायक सावित २ सय ९ रनको इनिङ्स खेलेका २२ वर्षीय जैसवालले यस शृंखलामा ५ सय ४५ रन बनाइसकेका छन् ।
