— नेपालले वाफ वुमेन्स च्याम्पिनयसिप २०२४ मा शनिबार प्यालेस्टाइनको सामना गर्नेछ । समूह ‘बी’ को यो अन्तिम लिग खेल हुनेछ र यसको नतिजाले समूह विजेता निर्धारण गर्नेछ । दुवै टिम यसअघि नै सेमिफाइनल पुगिसकेका छन् ।
आफ्ना सुरुआती दुवै खेल जितेको नेपाल र प्यालेस्टाइनको समान छ अंक छ । गोल अन्तरले नेपाल अगाडि छ । साउदी अरेबियाको जेद्दामा हुने खेल नेपाली समय अनुसार राति १०.४५ मा सुरु हुनेछ ।
त्यस अगाडि यसै समूहको अर्को खेलमा सिरिया र इराक भिड्ने छन् । शुक्रबार समूह ‘ए’ का खेलमा जोर्डनले लेवनानलाई २–० र ग्वामले साउदी अरेबियालाई २–० ले हरायो ।
यससँगै तीन पल्टको डिफेन्डिङ च्याम्पियन जोर्डन समूह विजेता बनेको छ । लेवनान भने दोस्रोमा रह्यो । दुवै टिम यसअघि नै अन्तिम चारमा पुगिसकेका थिए ।
